WILLEMSTAD.- Universidat di Kòrsou Dr. Moises da Costa Gomez a hasi un investigashon kuantitativo pa trese dilanti e eksperensianan ku traha for di kas i enseñansa na kas den temporada di Corona, fasilitá pa teknologia digital. E investigashon a keda guiá pa dr. Odette van Brummen-Girigori (UoC) i e tim di investigashon tabata konsistí di dr. Pieternel Dijkstra i Dick Barelds (Rijks Universiteit Groningen).

Resultado enseñansa na kas fasilitá pa teknologia digital

For di resultadonan a sali afó ku mayoria alumno i studiante na un medida rasonabel tabata disponé di e posibilidatnan i medionan nesesario pa por sigui enseñansa na kas efektivamente. No opstante vários alumno òf studiante a sinti falta di por konsultá ku dosente òf otro kompañeronan di klas òf di estudio, nan no tabatin un lugá trankil pa traha, un konekshon di internèt ku ta traha bon, un kòmpiuter òf laptop ku ta traha bon, òf sufisiente tempu pa sigui enseñansa na kas. Hopi biaha tambe gastunan mester a keda hasí (por ehèmpel material pa print òf un laptop) pa por hasi enseñansa na kas efektivo posibel.

Ademas e investigashon a mustra ku un kantidat notabel di alumno i studiante a sinti falta di e interkambionan sosial ku enseñansa regular ta trese.  Por lo demas  hopi alumno i studiante no tabata sinti nan bon ekipá pa por sigui enseñansa na kas efektivamente. Resumiendo, hopi alumno i studiante a eksperensiá enseñansa for di kas komo ménos positivo ku e enseñansa regular i hopi alumno i studiante tabatin e sentimentu ku enseñansa na kas tabatin un influensia negativo riba nan bienestar sikológiko, motivashon pa skol i nan resultadonan di skol òf estudio. Kasi mitar di e alumnonan i studiantenan ta mustra un aktitut negativo pa ku enseñansa na kas pa den futuro.

Pa mehorá kalidat di enseñansa na kas (ku sosten digital) na Kòrsou strukturalmente, gobièrnu,  direktivanan di skol, dosentenan, mayornan, studiantenan, alumnonan, i demas personanan konserní mester pone man huntu. Den e rapòrt ta duna akshonnan konkreto ku mester tuma lugá pa ekipá alumnonan i studiantenan mihó ku e medionan i kompetensianan nesesario pa por sigui enseñansa na kas efektivamente i  sòru pa tantu nan nesesidat di konektividat i nan nesesidat pa kompetensia wòrdu satisfasé mihó.