WILLEMSTAD.- For di djaweps atardi áwaseru a kuminsá kai i a sigui ayera djabièrnè ku mas intensidat.
Boletin di parti Gobièrnu di Kòrsou en konekshon ku wer ta menshoná ku  Ministerio di VVRP a forma un tim ku ta monitoriá e situashon aktual di wer. E ministerio ta trahando konhuntamente ku e kordinadó pa kòntròl di kalamidat ku ta yuda ku e parti di kordinashon multidisiplinario si ta nesesario.

A base di informashon di Meteo lo tuma e akshonnan nesesario i ta sigui informá pueblo.

Gobièrnu di Kòrsou ta supliká tur hende pa nan tambe sigui tur boletin di parti di Meteo via di su website www.meteo.cw, página di Facebook "Meteoroligical Department Curaçao", website di Kalamidat www.kalamidat.cw. Por haña informashon adishonal tambe via Facebook di "Risicobeheersing Curaçao" i e "app di kalamidat". E app por keda di download den "appstore".

Gobièrnu di Kòrsou ta pidi pa si dado kaso por tin molèster di awa ku a yena kas pa yama 917 i pa kualkier problema ku roi òf dam e number 521-7800.

KODIGO HEL: POSIBEL MAL TEMPU

Tempu: Por lo general hopi nublá ku momentunan di áwaseru ku por wòrdu kompaña pa welek ku bos. Algun di e áwaserunan aki por ta fuerte i lo kousa molèster di awa na sierto lugánan.

Temperatura máksimo lo alkansá 30°C. i temperatura mínimo 24̊C.
Solo ta sali 06:45 i ta baha 18:11 o.l.

Bientu: For di direkshon ost i moderá, forsa 3 te 4 (7 te 30 km/ora, 4 te 16 nudo). Prinsipalmente den áwaseru, de bes en kuando basta fuerte te fuerte den ráfaga; forsa 5 te 6 (31 te 50 km/ora, 17 te 27 nudo).

Situashon general: Un disturbio situá den nos region ta okashonando bastante áwaseru riba nos isla i ta moviendo poko poko den direkshon wèst. E sistema aki lo sigui kousa hopi nubia riba nos region durante próksimo 24 ora i por spera lokalmente vários áwaseru, kompañá algun kaminda pa welek ku bos. Algun di e yobidanan aki por ta lokalmente fuerte i por kousa sierto molèster na e lugánan di kustumber.

Meteo a midi algun lugá i na Klein Kwartier den algun ora mainta a kai 60MM di awa. Den otro partinan manera Sta. Maria, Biesheuvel i banda Bou a kai den kareda di 30 pa 35 MM di awa.

riba e fotonan por mira un bista di e lugánan di semper ku ta yena ku awa. Ki dia lo aliviá e situashon aki ta un misterio ainda.