WILLEMSTAD.- Ayera un biaha mas Kòrsou tabatin algun ora di molèster debí na e mal tempu i e kantidat di áwaseru ku a asotá nos isla.

Ya ta un kustumber di hopi aña ku na momentu ku áwaseru kai, vários parti di Kòrsou ta keda yená na awa i ta bira un molèster pa sigur outomobilistanan.

Ayera un biaha mas esaki tabata e kaso. Awaseru a kai i a yena vários kaminda aki na Kòrsou. Ayera nochi Aqualectra a informá riba su página di facebook ku tabatin diferente ‘storing’ kousá pa e mal tempu ku nos isla a konfrontá kuné. Na altura di Granbeeuw tin un storing grandi komo konsekuensia di un palu ku a kai i kousa basta daño na e sistema di koriente. Debí na esaki no tabatin koriente den e área aki. E trabounan  a dura te den oranan di mardugá. I ta basta yamada Aqualectra a haña di “storing”.

Fotógrafonan di EXTRA tabata riba kaya i a kapta algun imágen.