WILLEMSTAD.- Den henter e trayekto aki di vakunashon kontra e vírus di Corona tin diferente vershon ta kore rònt. Di un banda e informashon na fabor di vakunashon ta unu konsistente i no ta kambia, pero di otro banda for di e kampo ku no ke vakuná tin diferente sorto di vershon ta surgi kasi tur dia. Pero segun dr. Jerry Semper e meskos ku su demas koleganan den e bataya aki a keda konsistente i keda duna e mesun vershon. P’esei asta el a hasi un apelashon riba esnan ku ainda no ke vakuná pa hasi kontakto kuné. E último tempunan aki e tabatin kontakto via di WhatsApp, e-mail i tambe telefóniko ku hopi persona, i loke ta resaltá den e interkambionan aki ta ku hendenan ta karesé di e informashon korekto.

Segun dr. Semper, na mundu tin komo dies mion dòkter ku ta bisando e mesun kos na tur nan hendenan. Aki na Kòrsou tin nan tres ku ta saliendo regularmente den publisidat pa duna informashon i hasi apelashon riba poblashon pa bai vakuná. Pues loke lo por konkluí for di esaki ta ku no por papia di koinsidensia, pasobra médikonan rònt mundu ta huramentá pa na promé lugá nan protehá salú di siudadanonan, esei ta nan trabou prinsipal. Kon bo ta hasi splika ku tin tantu dòkter asina na mundu ku ta papiando e mesun idioma, esta ku nan ta dunando e mesun informashon den kombatimentu dje vakuna?

E úniko kos lógiko ta ku tur e hendenan aki ta papiando e bèrdat i ku e mesun meta. Djis pensa kiko e dòkternan aki tin di gana: solamente protekshon di salú di pueblo. E loke nan tin di gana ta mesun kos ku kualke otro hende, pasobra nan tambe a vakuná, no tin diferensia.

E meta ta pa haña ku mas tantu hende posibel ta sigui ku nanishinan den e mesun direkshon, pa bienestar di nan mes salú.

Falta di informashon:

Segun dr. Semper, el a ofresé su mes pa duna splikashon na esnan ku ta deseá esei. El a ofresé su number di telefòn (524-1414) pa yama i tambe si ta deseá manda un app. El a risibí un kantidat grandi di mail i a kontestá mas tantu ku tabata posibel, tambe e appnan. Yamadanan telefóniko tambe el a skohe.

Loke e por a konkluí for di e preguntanan ku a ser hasí na su persona ta ku tin ainda falta di informashon. Hopi dje personanan aki ta karesé di informashon korekto, miéntras ku tin otronan ta bayendo siegamente tras di e diferente teorianan pa trese temor i ku no tin ningun base.