WILLEMSTAD.- Mariëlla Olaria-Maduro, direktor di Sektor Empresarial, djárason último durante konferensia di prensa di gobièrnu a duna splikashon relashoná ku e areglo di TBZO, ku ta Sosten Empresario Individual. ‘For di luna di aprel nos a bin ku e sosten aki. For di luna di yüli e kantidat a baha drástikamente.’
Den periodo di aprel, mei i yüni mas o ménos tres mil petishon pa sosten empresario individual a wòrdu aprobá kada luna. Entre yüli i òktober e kantidat tabata entre mas o ménos 1100 i 1300 petishon aprobá pa kada luna.
Segun Olaria-Maduro for di yüli MEO a bin ku areglo mas estrikto pa aplikashon. Komo konsekuensia diferente empresario a disidí pa no apliká mas. ‘Tambe tabatin algun hende ku a bandoná nos isla.’
Pa e periodo di aprel te òktober un kantidat di mas ku 17 mion na supsidio a wòrdu paga. Segun Olaria-Maduro te ainda MEO ta pagando.
E sektornan mas presente ku ta haña sosten di TBZO ta Transporte Públiko (bùs i taksi), Músiko, Barberia/Kapsalon, Lora man (bende por ehèmpel pastechi, djus na kas òf riba kaya), bendedó di seguro.
Olaria-Maduro a bisa ku e grupo di músikonan ta e grupo ku a wòrdu afektá mas largu.
Mas aleu e direktor di sektor empresarial a bisa ku a stòp di habri portal entrante luna di òktober. ‘Pa motibu ku nos a haña petishonnan ku no ta kumpli ku e rekisitonan i nos a haña petishon dòbel, kual ta pone ku nos a haña èkstra trabou, ku a resultá despues na mas tardansa.’
El a bisa ku ta konsiderá e proseso komo un di konsientisashon pa nos empresarionan. ‘Pasobra nos a ripará ku hopi hende no ta na altura ku nan tin ku hasi ‘aangifte’ di OB. ‘Mas ku bo kompania no ta funshonando, bo tin ku hasi un ‘nihil-aangifte’. Nos mester konsientisá e hendenan pa nan sa kiko nan tin ku hasi. Pasobra hopi di nan pa promé bia a kuminsá apliká pa OB. Nos ta hopi kontentu ku awor hopi empresario individual a kuminsá ku esaki.’
Olaria-Maduro ta bisa tambe ku esaki ta konta pa e parti di faktura i tambe pa parti di inskripshon na Kámara di Komersio. ‘Pasobra hopi hende no ta kumpli ku e parti di e pago anual ku nan tin ku hasi. I tambe pa e parti di un bon atministrashon. Ta kosnan básiko ku nos a nota ku mayoria di e grupo no ta kumpli kuné.’