WILLEMSTAD.- ‘Tur hende ku a wòrdu kategorisá en kuantu di nan malesa komo esensial òf agudo a keda haña kuido durante periodo di COVID-19 tambe.’ Asina direktor médiko di Curaçao Medical Center dr. Ingemar Merkies a bisa ÈXTRA.
Banda di esei Merkies a atmití ku ‘e lista di espera ta basta grandi.’ Segun Merkies ‘den transkurso di lunanan esaki lo wòrdu resolbé. Pero e no ta bai di un momentu pa otro.’
Banda di esaki Merkies a bisa ku henter un proseso di evaluashon a tuma lugá den CMC despues di krísis di COVID-19 ku a dal hopi duru den lunanan di mart, aprel i mei. ‘Nos a wak kiko a bai bon, kiko a bai malu, kiko nos por mehorá. Pero si tin un kos ku mi por bisa ta ku si bo ta wak bou di strepi, bo por wak e fleksibilidat i unidat ku a surgi den e kaso aki na CMC.’
Merkies a splika ku durante e periodo di krísis na e momentu ku un di e trahadó di CMC a bai ‘un èkstra mile’, un otro trahadó a hasi e mesun kos. ‘Nos a sobrebibí konhuntamente i frankamente nos no mester tin miedu pa nèt nèt nada si e ta trata di salubridat.’ Merkies a bisa ku e krísis di Corona a mustra ku den CMC tin hende ‘asina adekuá’ ku a hasi trabou pa gerensia hopi mas fásil. Komo konsekuensia Merkies ta orguyoso di e trabou ku CMC a hasi durante periodo di krísis.
Mas aleu Merkies a bisa ku durante krísis di Corona CMC a haña hopi sosten for di otro hospital den region tambe. ‘El a trese sigur unidat. Por ehèmpel nos a haña aparato di hala rosea for di Boneiru i nos a manda nuebe pashènt ku Corona na Aruba. Komo konsekuensia CMC por a duna yudansa médiko. CMC por a fangu tur beibi ku a nase ku promé di tempu di tur e islanan.’ Den e periodo ku Colombia a sera, CMC tabata disponibel pa yuda beibinan for di tur islanan. ‘Tambe nos por a trata tur kasonan grave. Maske tabatin un seriedat di COVID-19 nos a keda ku yudansa agudo. Pa nos mes i tambe pa e region nos a fangu e kasonan nesesario manera no tabatin nada otro.’