Na CPost paga pa number di outo na Kiosko i sali den 5 minüt

WILLEMSTAD.-Awe ta e promé dia ku outomobilistanan por paga e belasting pa vehíkulonan motorisá por move riba kaya públiko, den boka di pueblo awe por kuminsá paga number di outo pa 2026. EXTRA tabata presente na e ofisina di CPost na Groot Kwartier i por a tuma nota di vários hende ku a bai for di tempran pa asina por kumpli ku e deber aki. Tabata notabel ku basta hende di edat mayor a bai para den rei pa asina paga nan number di outo.

E aña aki tin plachi di number nobo tambe pues lo tin hopi outomobilista ku lo ke pone e plachi di number nobo tempran riba nan vehíkulo.

Den kombersashon ku sr. Samuel Nicolaas, e persona di gerensia enkargá ku number di outo pa CPost, nan ta kla. Ta siman pasa djárason a notifiká CPost ku ta start ku benta dia 12 di yanüari. Tin algun aspekto importante ku Ontvanger mester regla di manera ku CPost por atendé e benta di forma korekto. Anteriormente a bisa ku ta bende plachi di number na 2027, pero despues e desishon a kambia i esei ta pone ku mester hasi ahuste den e Kioskonan di CPost. Na CPost e kliente por yega na un Kiosko paga su number di outo i sali den 5 minüt.

Samuel Nicolaas ta konta ku semper riba e dia ku kuminsá ku benta di number di outo, semper tin hopi hende ta yega riba e promé dia pa nan paga.