WILLEMSTAD.- E hòmber L.W. (36) a keda kondená na un kastigu di 12 luna di kual 6 kondishonal, pa transporte di droga.
E ta keda akusá di kier a transportá un kantidat di 507 gram di koka, den forma di pasta.
Segun e prosèsverbal, e akusado a yega Hato ku e intenshon, pa biaha pa Hulanda.
Durante kontròl, e personal di duana a ripará ku e akusado ta aktua basta sospechoso. Despues di a listr’e, na su paña, nan no a haña nada. Ora ku a listra e tas ku e tabata biaha kuné, nan a deskubrí bòmnan falsu, ku tabata kontené koka na pasta.
E akusado a atmití su kulpa na polis i a bisa ku e kier a transportá e droga pa e haña algun mil euro. Ta ora e yega, lo el a haña sa e kantidat eksakto.
El a bisa ku e tabata traha riba kontrakt, pero despues el a pèrdè trabou i a keda sin pariba sin pabou.
E tin 2 yu pa kria i hür di kas pa paga. Esaki a pone ku el a kai den desesperashon i a bai di akuerdo ku algun hende ku e konosé, pa transportá droga.
Fiskal a duna di konos’é, ku normalmente e kastigu pa e kantidat di droga ei lo tabata 18 luna di prizòn. Pero e ta tene kuenta ku e droga tabata na pasta i mester kita 20% porshento afó.
Mirando esakinan, fiskal a hasi un demanda di 12 luna di kual 6 kondishonal, ku un periodo di prueba di 3 aña.
Den su último palabra e akusado a bisa ku e tin hopi duele pa loke el a hasi, pero ta e situashon a hink’e den e problema ei. Sino hamas e lo a atendé ku droga.
Hues a tene kuenta ku su desishon i no a mira motibu pa desviá for di e demanda di fiskal.