WILLEMSTAD.- Ketu bai polisnan tin nan man yen ku hendenan riba kaya durante Toke de Keda sin un motibu bálido.

No opstante e hopi atvertensianan, te ainda e kantidat di vehíkulonan ku ta riba kaya na momentu ku e periodo di toke de keda drenta na vigor, ta relativamente hopi.

Den oranan di anochi i mardugá, polis a tene diferente ‘roadblock’ na vários área aki na Kòrsou. Pa shofùrnan di vehíkulonan i nan okupantenan ku tabata riba kaya despues di 11’or di anochi, tantu unidat di U.S.T. (Unit Speciale Taken), unidatnan di warda di polis di Punda komo di Rio Canario, a parti un total di 35 prosès verbal.

Ademas di esei e Departamento di Pèrmit di polis a duna but na propietario di dos establesimentu pa inkumplimentu.

Relashoná ku aglomerashon den Saliña, polis a sera algun di e kayanan ku ta kondusí pa e parti sentral di Saliña, di manera ku por a saka e grupo grandi di hende ku tabata konsentrá den e área ei.