WILLEMSTAD.- Gran parti di hóben Yu’i Kòrsou ku ta nase sin tata te ainda ta sinti falta di nan tata. Mayoria di hóben hulandes no ta sinti falta di un tata. Den general hóben hulandes ta papia mas negativo tokante ousensia di nan tata.
Esaki ta un di e konklushonnan ku investigadó Mariëlle Osinga a presentá djaweps 4 di mei durante presentashon na Universidat di Kòrsou.
A tuma lugá simposio tokante tatanan ousente bou di título: ‘Vaderafwezigheid: ervaringen en percepties onder Curaçaose en Nederlandse jongeren’ Oslinga huntu ku dr. Odette van Brummen-Girigori di UoC a presentá resultado di nan investigashon. Hopi públiko tabata presente durante presentashon den Aula di UoC i hopi di nan a bin ku pregunta pa e investigadónan.
E investigashon ta un proyekto di NWO, ku ta un instituto hulandes di siensia. Mariëlle Osinga a splika ku pa e investigashon a hasi entrevista na Kòrsou i Hulanda ku desénas di hóben ku a nase sin tata. Den e dos pais huntu 2222 hóben a yena un lista di pregunta tokante ousensia di tata.
E ta trata hóbennan ku a nase sin tata, ku ta nifiká ku promé ku e hóben tabatin 8 aña e tata a disparsé pa motibu di problema entre e mayornan. Segun rèktòr Francis de Lanoy na Kòrsou 40 porshento di hóben ta nase sin tata. Na Hulanda e sifra ta hopi mas abou.
Un konklushon di e presentashon ta ku hóben hulandes tin mas problema ku e echo ku nan a nase sin tata. Nan tabatin problema pa adaptá ku e situashon. Mayoria di hóben Yu’i Kòrsou ta bisa ku e echo ku nan a nase sin tata no ta un problema pa nan. Nan a adaptá nan mes na e situashon mas fásil.
Tambe a hasi investigashon relashoná ku envolvimentu na skol. Un di e konklushon importante ta ku no tin relashon entre ousensia di tata i envolvimentu na skol di e hóbennan. Pero por mira un relashon entre ousensia di tata i e nivel di skol. Osinga ta splika ku hóben ku ta nase sin tata den general tin un nivel di skol mas abou ku hóben ku ta nase ku tata den kas. Esaki por tin diferente motibu. Segun Van Brummen-Girigori un di e motibunan por ta ku pa un mama soltero ta difísil pa yuda su yunan ku tur trabou pa skol. Den general Osinga ta splika ku a base di e investigashon no por konkluí ku ousensia di tata tin hopi efekto negativo pa hóben. Na mesun momento e ta splika ku situashon pa kada hóben por ta diferente. “Pasobra kada mucha ta diferente.”