WILLEMSTAD.- Gran kantidat di hende ku a partisipá den elekshon pa un parlamento nobo dia 19 mart di e aña aki te ainda no a presentá un lista ku relatonan pa loke ta trata finansiamentu di nan kampaña. Asina presidente di Konseho Supremo Elektoral Raymond ‘Pacheco’ Römer ta skirbi den un karta, ku fecha 9 di yüli di e aña aki. Manera ta konosí kandidatonan ku a partisipá den e elekshon tin ku entrega un registrashon di donashon ku nan a haña entre 21 di yanüari 2021 i 19 di Mart 2021. E ta toka di donashon di 5000 Naf òf mas ku nan a haña. Durante elekshon di 19 di Mart den total 353 kandidatonan a partisipá den elekshon. Nan mester entrega nan registrashon no mas lat ku 20 di Aprel. Pero te ainda di tur 353 persona den total 197 kandidato te ainda no a entregá nan registrashon. Konseho Supremo Elektoral ta pidi tur 197 kandidatonan ku te ainda no a entrega nan registrashon pa hasi esaki mas lihé posibel.
KSE ta enfatisá ku kandidatonan ku no a haña donashon di mas ku 5000 Naf tin ku entrega un registrashon tambe. Tur kandidato tin ku entrega un registrashon.
Kandidatonan por bin na ofisina di Konseho Supremo Elektoral na WTC pa haña un formulario, òf nan por manda un email na info@kse.cw. Tambe tin ehèmpel di diferente registrashon riba wèpsait www.lse.cw. Römer tambe ta pidi tur partidonan enbolbí pa yuda e kandidatonan ku nan registrashon.
Si kandidatonan tin pregunta nan por yama 434-1639 tambe. Ofisina di KSE ta habri djaluna te djaweps entre 8.30 i 12 or i entre 14 i 17 or. Riba djabièrnè e ofisina ta habri entre 08.30 i 12 or i entre 14 te 16 or.
Römer den su karta di 9 di yüli ta skirbi ku kandidatonan ku no ta entrega e registrashon ta aktua kontra lei i ta kastigabel.