WILLEMSTAD.- Partido KEM ta kere ku gabinete  Pisas mester aserka Hulanda ku yudansa pa FKP (Fundashon Kas Popular) tambe, spesialmente pesnan di ménos rekurso ku ta hür kas na FKP.

Di akuerdo ku e partido KEM, hopi kas di FKP e dianan aki ta bai findishi. Gobièrnu ta duna FKP  supsidio di 5.4 mion pa e parti di Maatschappelijkezorg, kual ta pa e hendenan ku ta kobra ònderstant i ku nan no por paga e hür di kas kompleto. Segun KEM por a tuma nota, ku riba presupuesto di 2022 no ta aparesé FKP pa haña supsidio di gobièrnu. Esaki ta nifiká ku tur hende ku ta haña supsidio di hür di kas i ku gobièrnu ta paga e diferensia, nan ta bai haña problema. Pasombra mayoria ta kobradó di ònderstant, i nan no por paga e hür.

Segun KEM awe mes lo tin hopi findishi ta tuma lugá di e kasnan aki.  Pa kolmo no por para e findishinan.

KEM a indiká ku e úniko konsiderashon ku gobièrnu ta tene riba dje ta COVID i kos ta sigui deteriorá. E kos ta bira fèrfelu pa FKP i esnan ku ta hür kas serka e instansia aki.

Tin hende ku pa motibu di COVID, nan a bai purba drenta areglo, pero e kos a bira pisa.

KEM ta haña ku esaki ta un sla bou di faha di gobièrnu pa kòrta den supsidio di e “post Maatschappelijkzorg” riba presupuesto.

KEM ta kere ku no solamente a yega ora pa gabinete Pisas pidi sosten di likides pa tapa buraku di COVID, pero pa traha un plan kompleto pa aserka Hulanda pa yuda den aspekto sosial. Hopi hende sin trabou, riba ònderstant, NOW ta un problema ku hendenan no por haña labor, i ku sla bou di faha ta kòrta riba presupuesto di FKP.

Entrante awe lo tin hopi hende riba kaya.

KEM ta kere ku Gobièrnu Pisas tin di intervení i aserka Hulanda pa yuda FKP.

KEM durante presupuesto lo pidi pa pone suma di 5 mion bek na e pòst di “Maatschappelijkzorg”.