WILLEMSTAD.- Bou di pasaheronan di un buelo di KLM ku destinashon Amsterdam ayera tabatin hopi konsternashon na aeropuerto Hato. Gobièrnu hulandes algun dia pasá a disidí ku tur pasaheronan ku ta bin Hulanda tin ku mustra un deklarashon ku nan a hasi un PCR-test no mas ku 72 ora promé ku nan a bula, i ku e tèst a sali negativo. Hulanda a instalá e medida nobo dia 23 di desèmber. E regla ta konta for di 29 di desèmber. Hopi pasahero ayera tabata di opinion ku e medida no ta konta pa na, pa motibu ku nan ta bula dia 28 desèmber. Personal di KLM a bisa e promé pasaheronan ku a purba di ‘check-in’ ku e tèst ta obligatorio for di 28 di desèmber. Despues personal di KLM a komprendé ku e medida nobo ta konta pa pasaheronan ku ta sali for di awe òf mas lat. Tòg tabatin diferente pasahero ayera ku a sali aeropuerto pa hasi un tèst di PCR-test. Ayera no tabata konosí kuantu hende pa motibu di esaki no a bai ku e buelo di KLM i a keda Kòrsou.
Gabinete di Hulanda a disidí dia 23 di desèmber ku tur hende ku ta bin Hulanda for di eksterior tin ku hasi un tèst di PCR. Banda di esei nan ta pidi tur hende ku ta bin for di eksterior pa keda kas pa un periodo di 10 dia den karentena ora nan yega Hulanda.