WILLEMSTAD.- E aktual gobièrnu ku ta demishonario ta kontinuá ku nombramentu den diferente instansia semi gubernamental. Esun ku mas ta hala atenshon na Gaming Control Board ku ta kai bou di responsabilidat di minister di Finansa, Kenneth Gijsbertha.
Resientemente konsehero di “good corporate governance”, SBTNO a bisa ku no tin motibu pa duna konseho negativo riba nombramentu di sra. Constancia-Klabér komo miembro di e hunta di komisario di GCB.
E ta bira e di 5 miembro den e hunta di komisario banda di Zuleika Lasten, Clarelli Hato-Willems, Jamir Barton i Maybenette Laurens, ku a nombra na yanüari último. Manera ta konosí a traha un struktura nobo ku 3 direktor na GCB, ku ta drei for di plaka ku e industria di gaming (casino) mester paga e reguladó.
E aña aki te ainda a nombra miembronan den hunta di komisario na Fundashon Kuido Ambulans, NV Stadsherstel, Fundashon Kas Popular, Curinde, Aqualectra, Stichting Curaçao Innovation and Technology Insritute, Curaçaose Dok Maatschappij, Fundashon Organisashon pa Desaroyo Integral di Mucha, Woningbouw Curaçao NV, Fundashon Perspektiva i Sosten Integral, Dutch Caribbean Air Navigation Service Provider N.V. Tambe a nombra direktor na Woningbouw Curaçao NV i Refineria di Kòrsou.
Otro konsehonan ku a pidi SBTNO ta e fushon entre Fundashon Wega di Number Kòrsou i Stichting De Curaçaose Loterijen, kambio di statuto di Stichting Waarborgfonds Curaçaose Lotterijen i kambio di statuto di Stichting Fundashon Fondo di Loteria pa Bienestar di Kòrsou kua nan tambe ta enserá proposishon pa nombra miembronan den e hunta di komisario.
Ta for di aña pasá òktober por a kuminsá nota un oumento den petishon pa konseho ku a bai pa SBTNO riba nombramentu di miembronan di hunta di komisario òf gerensia na diferente instansia.