WILLEMSTAD.- Ya tin algun dia ku gerensia di Sentro di Detenshon i Korekshon Kòrsou ta risibiendo hopi keho  for di detenidonan relashoná ku e kuminda ku ta keda kushiná.

Segun bosero di SDKK Jabets Pinedo, e detenidonan ta reklamá ku e kuminda ta hole bombá, ta dañá i te asta a haña bestia den nan kuminda.

Manera ya ta konosí, ta mas ku un aña ku e kushina di prizòn ta for di servisio. Un kompania privá ta kushiná kuminda pa mas o ménos 500 detenido i ta entregá esaki na prizòn diariamente tres biaha pa dia.

Gerensia di prizòn a duna oido na e kehonan i ta atendiendo esaki pa asina wak ki posibel solushon lo por trese tanten ku kushina di prizòn mes ta keda kla.