Plataforma Bándariba:

WILLEMSTAD.- Habitantenan di Sta. Rosa i bisindario ta rabiá i fadá ku e situashon di asfalt den mal estado riba Sta Rosaweg na altura di pòmp di gasolin di Curoil na Herst. E kaya pa hopi tempu ta den hopi mal estado i ta kousa gastu pa outomobilistanan ku tur dia ta kore riba e kaya aí.

Presidente di Plataforma Bándariba, Elvin Gerard, ta bisa ku ta práktikamente tur dia e ta haña yamada i “app’ reklamando e mal kondishon ku e kaya ta aden. “Habitantenan ta sklama ku e mal estado di e kaya ta kibra tur tipo di piesa bou di nan outo. Ora nan reklamá esaki na Obranan Públiko nan no ta haña nan gastunan pagá tampoko.”

Gerard ta splika ku ta kontinuamente e ta reklamá e mal estado di e kaya serka tantu minister di Tráfiko, Transporte i Planifikashon Urbano, Charles Cooper (MFK) komo hefe di Obranan Públiko. “E minister no ta kontestá mi “appnan” miéntras ku e hefe di Obranan Públiko ta keda bisa ku ta den proseso pa bai drecha e kaya. Pero, ta te ki dia tin ku warda?”

E presidente di Plataforma Bándariba ta mustra ku despues ku a kaba di asfaltá Kadushistraat direktor di e kontratista ku a hasi e trabou a bisa den su diskurso, durante un aktividat spesial ku a organisá pa e okashon akí, ku a sobra un tiki sèn ainda. “Dikon no por a usa e sèn akí pa drecha e pida kaya malu akí riba Sta. Rosaweg? Gobièrnu ta asfaltá awor akí asta kayanan ku no ta riba tereno di gobièrnu.”

Gerard ta sigui bisa: “No tin nada kontra ku ta asfaltá kayanan di tera, pero no por sigui neglishá un kaya prinsipal manera Sta. Rosaweg kaminda kantidat grandi di outo ta pasa tur dia.” Mas aleu e presidente di Plataforma Bándariba ta mustra ku a pèrdè un bon oportunidat atrobe pa a drecha e kaya durante temporada di fakansi. “Ora tin skol tin asina tantu tráfiko ta pasa riba Sta Rosaweg ku ta peligroso pa bai drecha esaki na e momentonan ei.”

Gerard ta kòrda ku Cooper a yega di bisa den un entrevista na radio ku ta kobra hopi hopi sèn pa drecha e kaya. “Cooper a bisa ku tin un disputa ku un kontratista ku ta kobra 1 mion pa drecha e pida kaya loke bèrdat ta hopi sèn, pero mester buska un manera pa drecha e kaya sí. Tin 4 kontratista grandi na Kòrsou ku ta hasi e tipo di trabounan aki i por chèk entre otro kua di nan sí por hasi e trabou pa un preis mas rasonabel.”

Foto:

...Elvin Gerard...