Raymond Margaritha:
WILLEMSTAD.- Sindikato ABVO pa basta tempu kaba ta haña reklamo di trahadónan di diferente departamento i servisio ku ta kai bou di Ministerio di VVRP relashoná ku e trato ku nan ta haña. Ta trata di tantu e manera kon minister Charles Cooper ta papia di nan, komo maneho di e ministerio ku ta trata e personal riba un distansia.
Miembro di direktiva di ABVO, Raymond Margaritha ta bisa ku no ta solamente na servisio meteorológiko, pero tambe na por ehèmpel Obranan Públiko ta risibiendo pa algun aña kaba reklamo di trahadónan riba e manera iritante ku minister ta papia di trahadónan. “Asta hendenan pafó di gobièrnu ta indiká ku e manera ku e minister ta papia ta insólito i no ta e sistema korekto pa un doño di trabou papia di su trahadónan ku ta empleado públiko.”
Otro servisio ku tin reklamo ta Domeinbeheer, Margaritha ta sigui bisa indikando ku tabatin asta un dokumento trahá ku ta señalá ku tin sklabitut moderno ta tuma lugá ku trahadónan ku ta bou di kontrato na e servisio. Relashoná ku e reklamonan aki ABVO a manda un karta ku minister enkargá ku personal di gobièrnu, Ornelio ‘Kid’ Martina pa puntra kiko ta pasando.
ABVO ke sa si ta un malesa tin den gobièrnu ku ta plamando kaminda ta papia kon ku ta di ámtenarnan i ku ámtenarnan. “Minister Martina ta referí na e personal komo ‘su ámtenarnan’ i komo esun polítikamente responsabel pa e personal nos ke sa di dje kiko ta pasando i kon ta bai atendé ku e situashon aki.”
Margaritha ta enfatisá ku ABVO no ta aseptá sin mas ku ta manda e personal “bai flit” òf ku ta komentá riba nan bisando ku ta mihó nan “bai wak bientu supla”. “Si e trato di empleadonan públiko sigui di e manera aki no ta yega na pas laboral den e aparato nunka.”
Di otro banda e miembro di direktiva ta bisa ku ABVO no ta aprobá tampoko ku nan miembronan ta ekspresá nan mes di forma no korekto, pero na mes momento e sindikato tin komprenshon pa e aktuashon aki pasobra no ta resien e minister a kuminsá ekspresá su mes asina, pero ta pa basta tempu kaba e trahadónan ta soportá un trato arogante i iritante di nan doño di trabou.
“ABVO no ta den partisipá den hasimentu di bochincha, pero e ta sali si na defensa di su miembronan. Minister Cooper a laga sa ku e no ta sinta ku sindikato i pa nos bai reuní ku Sekretario General (SG) i Direktor Sektoral (SD), sinembargo e mester realisá ku e SG i SD tambe ta nos miembro”
Margaritha ta mustra ku minister mester tin orea pa e empleado públiko ku tambe ta parti di poblashon di Kòrsou i ku tambe tin sentimentu i famia. E ta supliká minister Cooper pa stòp ku su aktitut di arogansia i ta referí na loke grandinan tabata bisa: “arogansia ta kana dilanti di frakaso.”
Meteo
Relashoná ku e situashon spesífiko ku a surgi na servisio meteorológiko Margaritha a bisa ku siman pasá trahadónan a komprondé di nan direktor di e plannan di gobièrnu pa pone un kurá pa warda outo ku polis a konfiská banda di e edifisio di meteo. “E trahadónan a aserká ABVO i mi a bisa nan pa manda un karta pa e direktor pa e duna splikashon e situashon i kon ta garantisá seguridat di trahadónan.”
Margaritha ta enfatisá ku ABVO no ta kontra niun maneho di gobièrnu i semper lo duna espasio pa gobièrnu por implementá su maneho, pero seguridat di miembronan ta na promé lugá. Ta den e kuadro aki Margaritha ta bisa ku pa su sorpresa e por a tende minister Cooper a papia yen kos den medio ku no ta kuadra.
