WILLEMSTAD. - Den un komentario formulá pa redakshon di EXTRA, Giovanni Decaster Presidente di Sindikato Transporte Optimalisá (STO) a duna di konosé ku el keda aserká pa vários shofùr di taksi preokupá pa loke ku Presidente di e sindikato Sinusta a deklará na un radio emisora. Decaster ta di opinion ku e mester kontradesí e loke ku a bin dilanti p’asina evitá ku e taksistanan mester keda perhudiká sin nodi.

Decaster a splika ku e presidente di e sindikato Sinusta a deklará ku kos no ta malu pa taksistanan. Esun ku ta keha ku kos ta malu, ta pasobra nan no ke sali kas.

Ta trata di un reakshon ku a bin despues di intervenshon di e sindikato STO ku a sòru pa e telefòn na Parada di Taksi na Otrobanda keda drechá di manera tur taksi shofùr por hasi uso di dje i haña nan kareda, pa nan por saka nan dia pa kria nan famia. Defakto e intervenshon no tabata pa miembronan so di STO, pero pa tur taksi shofùr.

Durante un entrevista riba e aspekto aki, e presidente di Sinusta ta bisa ku si tin un miembro di STO ke pa e telefòn keda drechá pa e hasi su trabou, e no mester aserká un otro sindikato, sino e mester aserká den e kaso aki STO.

E presidente di Sinusta lo a sigui bisa ku taksi shofùrnan ta para na aeropuerto i avion ta baha e ku 7 or di anochi ku pasahero, pues tin trabou.

Decaster ta bisa ku TUI ta baha ku algu mas ku trinta i piku hende i KLM ta baha ku algu mas di kuarenta hende.

Tin bùsnan grandi pará eifó pa hiba e turistanan na hotèl i ta sobra kasi nada pa keda transportá ku taksi. E pregunta ta na opinion di Decaster, kon 200 taksista por biba riba algun avion ku ta baha ku dos pipita di hende.

Na opinion di Decaster si t’asina ei, dikon gran mayoria di taksista, pa no mester bisa tur,   ta buska yudansa via di areglo di NOW.

Si en bèrdat tin trabou anto tin algu totalmente robes ku e petishonnan pa e areglo di NOW di parti taksistanan.

Esaki ta loke ku tin hopi taksista awor aki preokupá, pa motibu ku nan ta pasando den momentunan hopi difísil, nan mester di e yudansa di NOW i awor e presidente di e sindikato Sinusta ta bisa públikamente ku tin trabou i ta esunnan ku no ke sali kas, kos ta malu pa esunnan ei.

Decaster a bisa ku si tabata kualke un taksista a ekspresá su mes di e forma ei, lo no tabata un problema, pero si e ekspreshon aki ta bin di un presidente di sindikato, anto esaki ta un problema grandi.

Decaster a splika ku el a drenta den kontakto kaba ku personanan di MEO pa splika ku e loke ku e presidente di Sinusta a splika na radio no ta kuadra ku realidat i e informashonnan ta eróneo pa no mester perhudiká e taksistanan ku si mester di yudansa di e areglo di NOW.