WILLEMSTAD.- Hopi Yu di Kòrsou no ta realisá ku nan por partisipá na e votashon dia 17 mart 2021 pa Tweede Kamer. Tin un gran kantidat di yu di tera ku a biba mas ku 10 aña na Ulanda. E regla pa nos ta simpel: si bo a biba mas ku 10 aña na Ulanda bo por vota. Bo mester tabata registrá (ingeschreven) si na un munisipio (Gemeente) na Ulanda. Si bo a pasa vários periodo di algun aña, pero e total di tempu “ingeschreven” a yega 10 aña òf mas, tambe bo ta kualifiká. Mester subi riba internèt i google “stemmen tweede kamer verkiezingen inwoners Curaçao”. E ‘site’ lo dirigí bu pa Gemeente Den Haag ku ta enkargá di tur siudadano ku nashonalidat ulandes ku ta bibá pafó di Ulanda. Unabes registrá na e ‘site’, nan lo informá via e-mail ki dia bo por bai buska bo dokumentonan di voto na representashon Ulandes na Kòrsou (na Skalo). Bo ta entregá bo voto tambe na e mesun lokalidat. Mester subi internèt e siman aki si, pasobra a sobra tiki tempu pa registrá i drenta e proseso.

Por vota si bo a biba na Ulanda komo mucha.

Si bo a nase i biba mas ku 10 aña na Hulanda òf bo a pasa mas ku 10 aña komo mucha na Hulanda ku bo mayornan promé ku bo a bini bèk Kòrsou, i bo tabata registrá na Gemeente, tambe bo por vota pa elekshon di Tweede Kamer. Bo mester ta mayor di edat si awe (18 aña òf mas).

Kòrsou por representá un asiento den Tweede Kamer.

Estadistikanan ta indiká ku tin mas ku 115.000 yu di tera di promé i segundo generashon bibá na Ulanda. Miéntras ku hopi studiante ta bai Ulanda pa sigui nan desaroyo edukashonal, mas ku 30% ta bini bèk den 5 aña. Sobrá ta keda mas largu i hasi nan promé eksperensia di trabou na Ulanda òf Oropa. Probablemente tin mas ku 10.000 siudadano Yu di Kòrsou, awe bibá na Kòrsou ku a pasa 10 aña òf mas na Ulanda i ku por vota pa elekshon na Ulanda. Di e mesun manera tin mas ku 5.000 Ulandes  eligibel pa vota tantu na Kòrsou i na Ulanda. Si bo konsiderá ku pa elekshon 2021 un asiento den Tweede Kamer ta representá 17.520 voto, si tur hende ku derechi di voto na Kòrsou pa Tweede Kamer kumpli ku nan derecho, nos isla por representá kasi un asiento kompleto.

Efektuá kambio na Kòrsou via di Ulanda

Yunan di tera bibá na Kòrsou, ku derechi di voto na Kòrsou i Ulanda, tin un responsabilidat úniko i diferente di otro yunan di tera. Nan por propagá hopi mas un kambio di polítika den Reino tantu via Ulanda komo na Kòrsou. Si bo inklinashon ta pa mas proksimidat entre Ulanda i Kòrsou, posiblemente partidonan manera Christen Unie, CDA, D66, i te hasta VVD por ta un opshon di voto. Si bo ta preferá mantenshon di outonomia manera definí for di 2010, partidonan manera PvdA, GroenLinks, Denk por ta un opshon. Si bo ke Hulanda kuminsá “pusha” Kòrsou pa independensia, probablemente un voto pa PVV, Forum voor Democratie of SP lo por yuda bo vishon polítiko.

Ulanda ku biyete di voto enorme

Miéntras ku na Kòrsou nos ta bai un elekshon ku hopi partido, Ulanda ta bai bati rèkòrt ku 41 partido ku a entregá nan lista pa partisipá na elekshon di Tweede Kamer 2021. Ta probabel ku e proseso di atministrashon i dokumentashon ainda por redusí e grupo aki te ku rònt 30 partido. Ya kaba ta papia di un biyete di voto (stembiljet) hopi grandi, difísil pa yena i kompliká pa konta. Vários ‘talkshow’ i institushon ta papia di un défisit demokrátiko ku lo benefisiá e partidonan tradishonal. Ku un ekseso di eskoho, intimidá dor di e tamaño di papel, unabes pará den urna, e votadó lo buta bala kòrá pa e nòmbernan tòp 5 di e partidonan mas konosí. (kontribushon di nos eksperto den elekshon na Ulanda)