Industria lokal

Ademas di e industria petrolero i di konstrukshon di barku, Kòrsou pa hopi siglo a konosé un sektor di produkshon, manera produkshon di liquer, di ròm, di aloe, di karbon i ántes tambe di mina (produkshon di wama na Mijnmaatschappij). Den añanan 80 bou di un maneho pa empuhá industrialisashon, gobièrnu a motivá diferente invershonista pa kuminsá ku produkshon lokal, e asina yamá industrianan ku ta remplasá importashon òf 'importvervangende industrie' manera nan ta bisa na ulandes. Despues ku gobièrnu a eliminá e maneho di protekshon di merkado na fin di siglo pasá, diferente di e fábrikanan aki ku a stòp di eksistí manera fábrika di hariña i fábrika di serbes, òf ku a stòp ku produkshon na Kòrsou i a bai laga traha nan produktonan den eksterior pa despues importá nan na Kòrsou, manera fábrika di zeta dushi. Otronan a kambia di direkshon kompleto manera e fábrika di produkshon di klabu ku betonmat, ku a bira un di e kasnan komersial di mas grandi na Kòrsou. Algun di e fábrikanan si a sigui ku produkshon, manera Antilliaanse Verfabriek ku e aña aki a kumpli 57 aña di eksistensia i ketu bai ta sigui inová pa trese e produkto di mihó kalidat pa nos merkado. Den e artíkulo aki e persona na timon di fábrika di fèrf, Horace Hinds, ta konta di historia, situashon aktual, i plannan pa futuro.

Direktor General di Antilliaanse Verffabriek

Horace Hinds ta sigui kere den balor agregá di industria lokal

Fábrika di fèrf Antilliaanse Verffabriek (AVF) ta un di e industrianan lokal ku tin mas tantu tempu establesí na Kòrsou. 57 aña pasá, na 1960, prínsipe Bernard ku tabata kasá di reina Juliana, a pone e promé piedra pa konstrukshon di e planta na Groot Davelaar. E akto aki a marka inisio di produkshon di fèrf den un forma industrialisá na Kòrsou. Den e añanan aki e fábrika a konosé momentunan di hopi ganashi, pero tambe periodonan di baka flaku. Segun Direktor General, Horace Hinds, sektor industrial lokal i sigur produkshon di fèrf na AVF ta sumamente importante pa e balor agregá ku nan ta duna na ekonomia di Kòrsou. Si introdusí algun medida pa regulá e merkado, e fábrikanan lokal por subi nan kontribushon na ekonomia aun mas tantu, Hinds ta bisa.

AVF su produktonan

AVF ta traha diferente liña di fèrf bou di e marka AVF Paints. Asin’ei tin fèrf di awa pa paden i pafó di kas. Tin fèrf di zeta i diferente tipo di vèrnis pa palu. Tin fèrf industrial ku por ehèmpel ta wòrdu usá den Refineria Isla, i tambe tin e asina yamá ‘structuurverf’ pa duna un diseño òf pa laga un muraya òf plafòn keda mas gròf. Ademas di e fèrfnan aki, AVF ta bende diferente otro tipo di fèrf i produktonan ku ta nesesario pa fèrfmentu. Den su showroom na Groot Davelaar ku ta keda pegá ku e fábrika por mira tur e produktonan aki. Einan tin ekspertonan tambe ku por asistí e kliente ku tur pregunta relashoná ku fèrfmentu i tin diferente palèt di koló i muestra. "No tin un límite na e kantidat di koló ku un kliente por skohe for di dje. AVF por produsí tur i ta traha esaki na e momentu ei segun ku e kliente ta warda riba esaki", asina Hinds ta splika.

Konstantemente e fábrika ta kambia i mehorá su empake i presentashon di produkto. Pero no esaki so sr. Hinds ta konta kon konstantemente nan ta sigui desaroyonan nobo den produkshon di fèrf. "Di un banda nos ta wak kiko ta e tendensianan nobo internashonalmente den mundu di fèrf i di otro banda nos ta wak kua di e inovashonnan aki ta pas ku nos merkado", Hinds ta splika.

Historia

Den kuminsamentu AVF tabata produsí eksklusivamente pa Refineria, ku e tempu ei tabata di SHELL. E doñonan a mira un oportunidat pa bende fèrf ku e planta di SHELL ku ta un kliente ku konstantemente tabatin mester di fèrfnan industrial pa entre otro trabounan di mantenshon. AVF tabata traha bou di lisensia di markanan renombrá mundialmente manera Akzo Nobel i Brink/Molyn. "Na un dado momentu e fábrika tabata asta registrá riba Amsterdam Stock Exchange, pero mirando e ganashi i stabilidat di e akshonnan, e doñonan a disidí di kumpra tur e akshonnan i hasi AVF un empresa privá.

Ku tempu a bin un reorientashon i aktualmente e merkado di fèrf doméstiko ta esun mas grandi pa e fábrika. Awendia nòmbernan manera Comotex, Comolux, Aqualux etc., ya ta nòmbernan standardisá bou di pueblo. Aktualmente AVF ta produsí práktikamente e mesun produktonan, pero den un merkado hopi diferente. E fábrika a pasa den un periodo di tabata e úniko provedor di fèrf ku Refineria, pa fèrf doméstiko den un merkado protehá pa un merkado kompletamente liber kaminda por bisa ku ken ku ke ta hasi kiko ku e ke, manera Hinds ta splika. E Direktor General ta konta ku ainda refineria ta un kliente importante pa AVF pero nan no por konta riba esaki so.

"Tin mas kompetensia i e refineria ta hasi ménos mantenshon". Awendia e kontratistanan ku ta traha riba e planta ta kompetí ku otro pa nan hasi trabou na refineria. Nan mes tin ku sòru di kumpra tur e material ku nan ta usa. "Loke ta pasa ta ku e kontratista ta bai shòp pa wak unda e ta haña e fèrf mas barata. Den esaki generalmente e ta wak e preis i no e kalidat".

Kon prepará pa kambionan den merkado i oumento di kompetensia?

AVF ta sigui desaroyo internashonal den mundu di produkshon di fèrf. "Na Kòrsou nos ta orientá hopi riba Oropa ku Merka. Un tendensia mundial ku AVF tambe sigur ta sigui ta esun di baha e kantidat di e asina yamá 'vluchtige stoffen' (VOC) den nos produktonan", Hinds ta bisa. Asin’ei tin e liña di fèrf 'Ambiance' ku no ta laga un holó penetrante ora us’é. Ademas e produkto aki tin hopi ménos efekto riba medio ambiente i ta tene kuenta ku un ekonomia sostenibel. E punto ta ku mester paga pa e inovashon aki si, pasobra e ingredientenan ta mas karu. E pregunta ku AVF mester tene kuenta kuné konstantemente ta si merkado ta dispuesto pa paga pa e oumento aki.

E fábrika tin e tarea di informá su klientenan di e benefisio di e produkto. "Pero semper bo ta haña un grupo di hende ku ta keda preferá e produkto tradishonal" Hinds ta bisa. Otro kambio ku ta representá un inovashon signifikativo ta e desishon di e kompania madre pa remplasá tur materia prima ku ta kontené chumbu i chromaat, pa remplasá tur e pigmentonan ku ta kontené chumbu òf chromaat ku tin den fèrf. E kambio aki ta importante pasobra e produktonan ei ta basta malu pa medio ambiente i salú di hende. E punto ta ku e ingredientenan ménos dañino pa medio ambiente i salú por resultá di ta mas kostoso.

Hinds ta splika ku pa e motibu aki mester evaluá bon si e klientenan ta dispuesto pa aseptá e produktonan ku ta mihó pa nan salú. E ta di opinion ku mirando e efekto pa salú di hende i pa medio ambiente, gobièrnu tin un tarea pa regulá e merkado i ta e ‘trendsetter’ pa prohibishon di ingredientenan ku ta dañino pa medio ambiente i salú di hende ounke e por ta mas kostoso. Di su parti AVF ta bai informá e klientenan via publisidat di e peligernan i dikon ta asina importante pa usa fèrf sin chumbu ni chromaat, ounke e por ta mas karu. Hinds ta haña ku kuido di medio ambiente i di tin un empresa sustenibel ta hopi importante.

Retonan riba merkado di fèrf

Aseptashon di e produktonan di AVF riba merkado ta hopi grandi. Tòg ainda tin hende ta kere ku loke wòrdu importá ta mihó kalidat. Despues ku a kita protekshon na fin di siglo pasá hopi fábrika lokal a disparsé. Kon bin AVF tei ainda? "Nos a keda lucha i ta luchando den e balentenan, no ta fásil. kompetensia a bira hopi mas pisá. Awendia tin mas ku 20 marka di fèrf riba merkado di Kòrsou. Mayoria di nan ta wòrdu importá, anto tin dos fábrika di fèrf lokal. Pero nos ta produsí un produkto ku benefishinan úniko" Hinds ta splika. AVF su produktonan ta 'true tested' na Kòrsou mes, kaminda a tene kuenta ku e klima, e solo i e kustumbernan di e klientenan. Manera e tendensia di no ke warda e tempu nesesario ora kaba pleister un kas, promé ku fèrf. Segun Hinds pa e fèrf keda bon, mester warda por lo ménos 6 siman promé ku fèrf. Pero awendia e hendenan ke fèrf mes ora. Otro reto ta e tendensia pa finalisá e trabou di pleister ku Pego. "Pego ku fèrf ta enemigu, ta manera awa ku zeta". AVF ta organisá training grátis pa fèrfdó nan pa splika nan kon ta e manera mas optimal pa usa e produkto.

Na 2009 e kompania Pintuco di Colombia a bira e úniko doño di AVF ora nan a kumpra e akshonnan for di e otro doñonan. Pintuco tabatin akshon kaba den AVF, pero ora e otro doñonan a skohe pa bende nan akshonnan. Pintuco ta forma parti di e multinational Latino Amerikano Grupo Orbis ku ta un fabrikante di fèrf ku ta dominá merkado den Latino Amérika.

Den kuminsamentu mester a kustumbrá ku e struktura nobo di e empresa. AVF ta un fábrika hopi chikitu kompará ku tamaño di e empresa madre. E kompania madre tin un planta moderno i laboratorionan sofistiká pa hasi tur tipo di análisis di fèrf. Mester a dediká atenshon na splika e klientenan ku pa e produkshon lokal di AVF a bin awor un aliado ku ta sigui garantisá produktonan di kalidat. Produkshon di fèrf di AVF a keda kompletamente na Kòrsou.

Balor agregá di industria lokal

Hinds mes ya tin 22 aña ta traha na e fábrika. E ta konta kon ora el a kuminsá traha tabata asina ku ora un persona ke pa traha un sierto koló di fèrf, nan tabata traha esei den e fábrika. Despues di kuater dia e persona por a pasa tuma e fèrf ku el a pidi. Awendia e persona ta yega na kualke AVF store, ta skohe su koló i einan mes, segun ku e ta warda, nan ta bira traha e koló ku e kliente ke.

Aktualmente tin 53 persona ta traha na AVF. Ainda ta un kantidat respetá, pero promé ku a habri e merkado esaki tabata 63. "Tur e personanan aki tin nan salario pero tambe nan benefishinan sekundario danki na e produkshon lokal di fèrf". Pero no esei so, Hinds ta enfatisá e importansia di e orguyo ku e trahadónan ta sinti den nan trabou. E echo ku bo ta traha un produkto final for di e materia prima ta duna e trahadó un sentido di balor. Ademas di e labor direkto aki, e fábrika ta sòru pa hopi empleo indirekto di tur e fèrfdónan i otro empresanan ku ta entregá servisio na AVF. "

Produsí un produkto riba nos merkado riba un base industrial ta hopi mas difísil ku simpel importá i bende, pero e ta kumbiní ekonomia muchu mas. P'esei ta importante pa gobièrnu regulá loke ta drenta nos fronteranan. Hinds no ta pensa riba protekshon pero e ta kere ku mester bin sierto regla si i e ta splika kon difísil ta por ehèmpel si un hende ke eksportá produkto pa China. Tòg por mira kon fásil ta pa produktonan di China drenta nos merkado.

Ounke AVF ta produsí prinsipalmente pa merkado lokal, na e momentonan aki e ta eksportá na Aruba, Boneiru i St. Maarten. Kaminda nan tin e konsepto di AVF store. Hinds ta splika ku AVF ta hopi interesá pa eksportá pa Karibe, pero aki nan ta praktikamente imposibel pa drenta komo ku Kòrsou no ta forma parti di e merkado komersial Karibeño (CARICOM). Paisnan Karibeño ku no ta den CARICOM tambe tin barera ku ta stroba importashon di fèrf.

Mayoria pais ta stimulá produkshon lokal pa e balor agregá ku esaki ta trese kuné, den sentido di empleo, evitá huida di divisa, fábrika ta kumpra mas servisionan lokalmente etc. Mester tene kuenta tambe ku hasi negoshi na Kòrsou no ta barata. De fakto mester ta asina ku tur bia ku tin un oferta òf un ‘bid’ pa un proyekto ku gobièrnu ta paga, e fabrikante lokal mester haña preferensia si su produkto ta di un kalidat komparabel ku e otronan ku ta kompetí.

Loke a tene AVF na bida pues ta e echo ku nan no ta para ketu. "Bo tin ku bai ku tempu. Tene bo gastunan bou di kòntròl den tempu bon i den tempu ménos bon. Sigui inová i evolushoná sigui trese produkto nobo i sòru pa bo kliente semper ta kontentu" ta algun konseho ku Hinds tin pa otro empresarionan. E ta rekordá ku semper tin riesgo. Pero mester analisá esakinan i wak kon ta kontrolá nan.

Periodo di fin di aña

Hinds ta splika ku ounke ku fin di aña ta e periodo ku ta bende mas fèrf, e fábrika ta prepará henter aña pa por kumpli ku kualke demanda ku bin. Esaki ta posibel pasobra AVF ta un fábrika hopi fleksibel nan por produsí loke e merkado pidi, ora e merkado pidi esaki. Pa loke ta trata e aña aki tambe AVF ta tene kuenta ku e oumento di demanda ounke ku ekonomia ta un tiki wantá i oumento di kompetensia e aña aki ta mas tantu. Manera semper AVF ta kla pa risibí tur kliente pa asistí nan ku kualke pregunta i ku nan deseonan.