WILLEMSTAD.- E Asosashon di Restorantnan di Kòrsou (CRA), ta sklama pa gobièrnu suavisá medidanan. E asosashon ta spera ku djaluna próksimo durante di evaluashon aktual di COVID-19, ku lo por suavisá medidanan. Tin tres punto masha importante pa horeca. Na promé lugá bishitantenan por sinta den e lokalidat. Esaki ku e protokòlnan, meskos ku a usa esakinan den kasino i otro fasilidatnan ku por sirbi hende parti paden.
Na di dos lugá, e sektor di horeca ta pidi pa manda e toke de keda na 11 or di anochi. Asina e restorantnan por risibí nan klientenan, i sin ku esakinan por ta na mes momentu.
I finalmente nan ta pidi pa por bolbe sirbi alkohòl.
Hende ku ta konsumí alkohòl sintá na un mesa no por kondusí na mas kontagio, pero si nan ta kontribuí na un dushi diner. E echo ku no por bebe un alkohòl banda di nan kuminda, hende ta konsiderá esaki un motibu ku nan no ta interesá pa sali bai kome afó, kual tin konsekuensia pa nan pèrdè hopi plaka.
CRA ta di opinion ku e medidanan aktual e sektor ta sufri, i mas ainda kaminda a krea konkurensia inhustu. Banda dje orario ku Truk’i Pannan ta habri durante di oranan di restorant, hopi hende ta bai hotèlnan kaminda nan por bebe alkohòl. No ta un sekreto ku durante di dianan di fiesta, hotèlnan tabata yen yen. I vários kaminda tabatin fiestanan grandi. Miéntras restorantnan a keda limitá pa ta habri te 8 or di anochi i sin posibilidat di sirbi alkohòl.
E asosashon di restorant a keda indigná ku kasinonan a habri i eseinan si por bebe, miéntras no a bin ningun reakshon riba proposishon di CRA, pa laga restorantnan habri ku e protokòlnan korekto. P’esei nan ta spera ku djaluna awor gobièrnu lo suavisá e sektor di horeca, spesialmente restorantnan.
E sektor di horeca den aña ku a pasa ya a haña sla kaba. Banko Sentral su pronostiká pa 2021 ta mustra ku e sektor por rekuperá si e situashon riba término korto keda normalisá.
Aktualmente CRA ta hasiendo investigashon di sifranan di último aña pa haña esakinan. Ta bon kla ku 2020 tabata un aña difísil. P’esei CRA ta hasi un apelashon urgente riba esnan ku ta atendé ku maneho pa tene kuenta ku e sektor aki ku ta responsabel pa vários trabou, i ku último lunanan a haña sla duru dor di tur medidanan ku a keda tuma.
Sin yudansa òf suavisamentu, tin e rísiko ku mas hende lo pèrdè nan trabou i mas restorant lo tin di sera nan porta nan.