WILLEMSTAD.- Sindikato Horecaf resientemente a manda nan resolushon ku a keda tene durante Konseho Statutario di e delegadonan di e sindikato. E promé resolushon ta karga e nòmber “Proyekto di Hospitalidat Kaminda pa trabou”. E sindikato ke pa parlamento tuma nota di nan deseo, esta pa start atrobe proyektonan di formashon pa sektor di Horeca.

A base di loke a bin dilanti, Horecaf ke a pone na konosementu di parlamentu e siguiente konsiderashonnan: Komité Ehekutivo di Horecaf na aña 2018 a entregá un dokumento relashoná ku e proyekto di formashon pa potensial trahadónan pa e sektor di Horeca na èks minister di SOAW di partido MAN, sr. Hensley Koeiman. Den kuadro di e reunionnan di Plataforma di Diálogo, miembronan di komité Ehekutivo di Horecaf a entregá minister presidente sr. Pisas i minister di SOAW un kopia di e proyekto pa despues tambe na otro “stakeholder” nan entre otro CTB, VBC, Asosashon di Restorantnan di Kòrsou i otro instansianan.

Den mesun temporada ku esaki a keda entregá, dirigentenan di Horecaf a reuní na algun okashon ku “stakeholder” nan pa atendé e proyekto aki. Despues di e diferente kombersashonnan, aña pasa Chata a start ku un proyekto di formashon similar pa potensial trahadónan pa e sektor di Horeca. Pa motibu di e pandemia di COVID-19 i e “lockdown” nan, Chata no por a kontinuá ku e proyekto di formashon pa miembronan di den e sektor di Horeca. E proyekto di formashon pa e trahadónan den e área aki ku ta buskando trabou de e sektor ta unu di sumo importansia. Ta p’esei Konseho di Delegadonan di Horecaf a elaborá i a aprobá e resolushon, segun e sindikato.