WILLEMSTAD.- E último añanan Horecaf ta siguiendo e desaroyonan riba merkado laboral hopi di aserka, i kada biaha di nobo, tin ku skucha opinion di gobièrnu i dje gremio empresarial riba flèksibilisashon di merkado laboral, ku supuestamente mester sirbi, pa mas trahadó por yega na boka di trabou. Den e kuadro akí, manera ta keda presentá, i segun e ‘landspakket’ i posishon di e gremio empresarial ta bisa, ku mester hasi algu ku e leinan laboral, e.o e relahamentu di e derecho di retiro, redukshon den orarionan di trabou, kontraktnan pa tempu definí, trabou pa tempu parsial, i kitamentu di opstákulonan pa tuma trahadónan djafó drenta Kòrsou pa traha.
Presidente di Horecaf kenneth Valpoort, na nòmber di Komité Ehekutivo di Horeca, ta remarká ku e ponensianan ariba menshoná no tin ningun estudio sientífiko hasi riba nan. No ta papia pa ban hasi trahamentu den turismo mas atraktivo, ku esei por bai subi e produktividat, p.e pa yega na un penshun general pa e trahadónan den e sektor, pa pone mas atenshon na e malesanan ku ta keda afektá pa trabou (bedrijfsziektes) ku e trahadónan ta konfronta.(para oranan largu riba pia)
Horecaf for di un prinsipio riba henter e asuntu di relahamentu di e maneho relashoná ku e merkado laboral, a rechasá e pensamentu akí, pasobra ya pa añanan largu nos tin eksperensia amargo, ku tur e kosnan ku ta papia di dje e.o pa mas flèksibilisashon, tur dia ta marginando trahadónan di tur forma, kaminda tur gobièrnu di turno, a permití e mal práktikanan akí tuma lugá.
Horecaf, sindikato afiliá na CGTC, den un komunikado fechá 27 di yüli di aña pasá, a kompartí e komunikado pa laga nos bos resoná, ku nos no ta bai di akuerdo, pa ni papia, te pa aseptá pa tòrnu na e lei di retiro akí. E proyektonan di leinan laboral, pa duna un empuhe pa stòp e abusunan ku ta keda kometé kontra di e trahadónan no ta haña oido, e.o e leinan pa suavisá e proseso di referèndem, e lei di ‘verbindend verklaren’ di kontratonan kolektivo, revishon di areglo di labor di aña 2000, (arbeidsregeling) e asuntu di ‘uitzendbureau’s, kual ta uno diskriminatorio
Lòs for di flèksibilisashon di e merkado laboral, Horecaf a mustra interes den e aspekto di desempleo ku tin, i ademas e gritunan ku ta keda lansá, ku no tin òf no por haña hende pa traha den e sektor di turismo i gastronomia. Pa motibu ku Horecaf ta siguiendo e desaroyonan ku ta tumando lugá den e sektor, ta hasi ku nos ta duna nos aporte pa yuda esnan ku ta buskando trabou.
Ta hasi 3 aña, ku Horecaf a traha un konsepto di un proyekto di formashon pa e sektor di hospitalidat, pa nos hendenan ku ta buskando trabou. Esaki komo ophetivo prinsipal, p’asina esnan den e proyekto di formashon terminá e kurso di formashon akí, nan tin sikiera un base di e funshon i e diferente disiplinanan kual empresanan ta buskando.
Pa Horecaf, e partisipantenan di e proyekto lo tin opshon pa solisitá na e empresanan kaminda nan a kore nan pasantia(stage), p’asina nan por bini na remarke pa trabou.
Horecaf a kombiná un laso estrecho di koperashon ku e asosashon di restorantnan (CRA) i CHATA, kaminda nos a bai di akuerdo pa organisá un feria di trabou, pa wak kuantu persona lo akudí na esaki, ku ta mustra interes pa un trabou. E feria di trabou a kondusí na un asistensia bon, ku un kantidat di 450 persona.
Un punto importante ku Horecaf ke ekspresá ta, ku a bira tempu pa dunadónan di trabou asumí un sentido di flèksibilidat, pa yuda esnan ku ta buskando trabou. Nos eksperensia a demostrá, ku empresanan no mester keda para duru riba kriterionan sumamente eksagerá ku nan ta eksigí, promé ku tuma trahadó na trabou.
Di otro parti Horecaf ta bisa, e trahadónan ku ta trahando, e empresanan mester wak, kon por mantené mas tantu hende ku ta posibel na trabou, desviando for di e sistema di kontraktnan pa tempu definí, i e otro kondishonnan ku ta ménos agradabel, ku ta keda praktiká riba merkado laboral, kaminda masha poko posibilidat ta keda kreá, ku ta pèrkurá garantia pa e trahadó tin un futuro stabil.
Ta p’esei e aspekto di formashon kontinuo di nos hendenan ku ta trahando, ta masha nesesario pa krea un núkleo sólido, pa e trahadónan aki por sigui duna é servisio ku nan a kustumbrá na hasi.
Den un frase, Horecaf ke mira un ‘maneho di flèksibilidat pa kolaborashon laboral’ di parti di dunadónan di trabou. Si dunadónan di trabou por krea i implantá e sentido aki den nan sistema operashonal, ta un muestra positivo, ku berdaderamente nan ke yuda nos hendenan, pasobra ta aki tur komersiante ta traha pa yuda nan mes, i na di dos lugá pa nos pais bai dilanti.
Den mesun rosea, Horecaf ta pidi pa empresanan reservá fondonan pa e parti di formashon tantu interno komo eksterno, pa e personal por partisipá na su desaroyo i formashon riba tur nivel ku ta nesesario, pa e por progresá, i yuda su mes i e negoshi ku a invertí den dje.
Pues pa Horecaf ta esensial, si komunidat ke mira pa trahadónan haña kaminda pa trabou, tin bira un deber di e boluntat, disiplina, kultura i gana di traha di nos hendenan. Di otro banda ta konta tambe, si e dunadónan di trabou, tin konsenshi i boluntat pa tuma nos hendenan na trabou, i yuda pa nan por hasi karera den e empresa kaminda e faktor produktivo, ta di sumo importansia pa hiba e negoshi dilanti.
Pa Horecaf, Kòrsou no por para mira i tende mas, ku nos hendenan no ta kualifiká, òf pió ainda, no ke traha. Ta un obligashon pa tur gremio i instansia duna un man, pa kibra ku e tendensianan negativo akí, i sòru pa konbertí nos mas den tendensianan positivo i progresivo.
Horecaf ta konsiente i bon na altura, ku kada empresa tin nan polítika i kriterionan pa tuma hende na trabou. Pero mester trata ku mas indulgensia pa duna un man pa mas hende por haña kaminda den nos empresanan den e sektor. Ku akshonnan positivo, e interes i ánimo pa krea henter un kultura di trabou nobo lo lanta den nos pais.
Horecaf ta spera di por a duna un pensamentu pa akshon nobo den e kuadro akí, i ta keda pendiente pa mira ki dia esaki lo keda kristalisá den e sektor, ku a bira un di e pilarnan ekonómiko di mas importante den nos pais.
Ku e komunikado akí, Horecaf un biaha mas ke rekordá trahadónan i esnan ku ta bai drenta merkado laboral, pa nan ta organisá, ya asina nan por tin e sosten i defensa, pa den tur sentido i momentu, nan keda yudá i representá.
Palabra i akshonnan ta keda na tur, ku ke hiba e sektor i e pais aki dilanti.