ORANJESTAD/W’STAD. - Ayera mainta Dr. Horacio E. Oduber Hospital (HOH) a tuma despedida di e promé kuater pashèntnan di Kòrsou. Tabata un momento sumamente emoshonal i sigur alegre pa e pashèntnan di Kòrsou ku ta regresá kas sano i serka nan famia despues di a batayá COVID-19. Tim di enfermeranan huntu ku representantenan di Hospital tabata presente pa asina hiba algun palabra i brinda nan un gesto chikí pa nan keda kòrda Hospital i sigur Aruba ku tabata tei den momentonan difísil.

Dia 1e di aprel Hospital di Aruba a anunsiá ku den kuadro di solidaridat i humanidat ta saka un man pa islanan ruman Kòrsou i Boneiru ku ta pasando den momentonan sumamente difísil. Na e momentonan ei HOH a eskalá, habri mas kama pa pashènt di COVID-19 ku konsekuensia ku algun operashon efektivo mester a keda kanselá.

Na momento ku a hiba palabra por a mira e alegria den wowonan di e pashèntnan ku ta sumamente gradisí ku Aruba a habri man pa nan i e tremendo kuido ku nan a risibí na Hospital. “Ta un honor ku HOH por ekstendé un man i demonstrá hermandat  den momentonan di insertidumbre i ta di opinion ku esaki mester ta komienso di mas kolaborashon entre e islanan den futuro serkano,” asina sra. Olga Rodriguez a terminá.

“Personal di Hospital, aunke hopi kansá mirando ku nan tin mas di 1 aña trahando inkansabel, no a duda pa habri man i yama pashèntnan di Kòrsou i Boneiru bon biní aunke lokalmente tambe e kasonan tabata subiendo. Algu di aploudí, ta ku aunke e pashèntnan tabata leu for di kas, staf i personal di HOH a pone nan sinti den nan kurason ku nan ta na kas,” asina Charlaine Huntington di departamento di Komunikashon a menshoná.

Pashènt Daal a ekspresá ku “e kariño ku e personal di HOH a demostrá a dun’é e fortalesa ku el a bira mihó i alabes el a yama danki na pueblo di Aruba ku no a lag’é na kaya!”

Pashènt Paulina a gradisí tur e staf i personal di Hospital pa e bon servisio. “Mi a bini drumí i awe mi ta bai kas bèk sintá, pashènt Paulina ta bisa emoshoná.

Hospital kier a gradisí Kòrsou pa tur e konfiansa pa nan por a brinda kuido i duna un man. Na e personal di Hospital ku un bes mas a demonstrá nan profeshonalismo, pero tambe solidaridat i humanidat i por último e pashèntnan lokal ku a komprondé e situashon na momento ku mester a kanselá algun operashon. Aruba a demonstrá un bes mas di ta grandi. (NoticiaCla)