WILLEMSTAD -- E hospital nobo ku ta trahando den Otrobanda lo no habri si no tin garantia ku tur kos ta kana bon. "Nos no lo tuma ningun riesgo", asina Wallé a bisa a rais di publikashonnan di e siman aki ku e fecha di entrega kisas lo bai skùif un poko mas leu atrobe.

E konstrukshon ta kanando algun luna atras riba e skema i ya a kambia e fecha di entrega na diferente okashon. Ultimo fecha di entrega ku a anunsiá ta dia 15 di novèmber awor. Pero si ta nesesario lo ekstendé e fecha aki ku algun siman mas. Di tur manera lo sigui hasi esfuerso pa yega e fecha ei pero si no tin e garantianan nesesario, mester warda, asina Wallé a bisa.

Wallé a bisa tambe ku ta kontrolá tur aspekto debidamente di e proyekto. E kompania AT Osborne, un di esnan di mas renombre internashonal riba e tereno aki, ta chèk tur detaye di e konstrukshon i tambe aspektonan ku tin di aber ku e makinaria den e instituto nobo. Si ta pochi wc mester kambia, lo mester hasi esei. Si tin otro kos ku no ta bon, tambe lo atendé esei, asina Wallé a remarká. En total e kompania tin den kareda di 8 mil punto pa chèk durante e proseso di kòntròl. Un aspekto importante ta, segun Wallé, ku aki no ta trata djis kambio di un edifisio pa un otro edifisio. E espíritu di e proyekto di un hospital nobo ta ku mester bai wak henter nos ambiente di salubridat di un otro forma. E hospital nobo ta un  di e katalisadornan den e proseso aki, asina el a splika.

E proyekto a hañ'é últimamente ta atendé un gran kantidat di informashon ku ta eróneo i inkorekto. "Si djis yama nos, por a atendé tur punto ku ta bin den publisidat di kua diferente ta fake news. No opstante esei nos ta sigui traha dirigí. Nos lo no pèrdè nos énfasis pa Kòrsou haña un hospital ultramoderno i un vishon nobo riba tereno di salubridat, asina Wallé ta bisa.