Hospital San Nicolas Aruba ta bai konsentrá riba diálisis di nir pa sirbi otro islanan

A informá minister Knops durante su bishita na Aruba ayera

WILLEMSTAD.- Minister Raymond Knops, enkargá ku asuntunan di Reino ta na kaminda pa Korsou despues di su bishita na Aruba i Boneiru. E minister ulandes a kuminsá su bishita na Karibe ulandes dia 13 di yanüari último, kaminda el a bishita su ekselensia gobernador di Aruba i tambe e premier. E bishita na Aruba tabata mas den kuadro di pone atenshon na e hospital nobo na San Nicolas i e fundashon ku ta yuda hende muhé den difikultat. E hospital na San Nicolas a mustra ku nan ta bai spesialisá riba diálisis di nir, tratamentu di radiologia ku e pensamentu pa bai sirbi e otro paisnan den besindario.

Awe djamars 14 di yanüari minister Knops ta na Boneiru hinter dia i pa mas lat e bini Korsou. Aki e lo partisipá na e ‘Justitieel Vierpartijen Overleg’ i tambe e lo bishita algun proyekto. E hospital na San Nicolas yama Instituto Medical San Nicolas (IMSAN).

Na opinion di e mandatario ulandes, IMSAN ta komplementá di forma tremendo e servisio médiko ku ta keda brindá na pueblo di Aruba. Ta bini aserka ku IMSAN a opta pa bai spesialisá riba algun tereno entre otro diálisis di nir i tambe tratamentu di radiologia. Ta bai konstruí un edifisio spesial pa esaki. . banda di e poblashon di Aruba ta nifiká ku IMSAN lo por brinda su servisionan na otro paisnan den region.

Knops a bishita tambe un sentro ku ta brinda yudansa na hende muhé den nesesidat. Ulanda a yuda Aruba di manera ku por a amplia e kapasidat di e sentro aki di 15 pa kasi 40 persona. Knops a bisa ku e ta haña importante ku por yuda e grupo di hendenan ei. Mas detaye den edishon di EXTRA.

SHARE

LEAVE A REPLY