WILLEMSTAD.-E situashon di koriente di último dianan tin su impakto riba hospital Curaçao Medical Center (CMC) tambe. E instituto ta informá, pa medio di su bosero Germaine Gibbs ku nan ta riba nan generatornan for di wikènt i awor si ta yega e momentu ku mester hasi e mantenshon nesesario na e mashinnan aki ku tin 72 ora den servisio kontinuo.

CMC ta haña ku ta nesesario pa kanselá tur sitanan di awe na Poliklínika. Pa por garantisá kuido esensial, agudo i di emergensia ta kanselá tur sita na Poliklínikanan i ta sera algun deportamentu atministrativo ku no ta esensial pa no surpasá kapasidat máksimo di generatornan. Lo sigui garantisá kuido na tur pashènt hospitalisá.  Asina ku Aqualectra por garantisá stabilidat di suministro di koriente, CMC lo bai bek riba ret di Aqualectra.