WILLEMSTAD.- Hotèl Plasa ta sigui bai atras i no tin bista riba un kumpradó no opstante esfuersonan intensivo ku a hasi. Pero miéntras tantu kondishon di e hotèl den Sentro di Punda ta bayendo konsiderablemente atras. EXTRA a tuma nota ku partinan di e infrastruktura a kuminsá garna i tambe ku herunan di sosten di e edifisio a kuminsá frusa.

Hopi biaha e hendenan ku ta kana den e área no sa mes ki peliger nan ta kore pa no papia mes si algu mester pasa  ku e edifisio kompleto. Bèrdat ta ku e edifisio ta vigilá parti abou pero esei no ta un garantia pa loke ta trata kondishon di  edifisio mes. Hopi biaha tin outo parker den e área aki si nan ta konsiente di e peligernan serio. Kisas a bira tempu pa outoridatnan manera MEO i Brantwer  huntu ku Inspekshon di Seguridat tira un bista den e edifisio.

EXTRA a para na sierto altura na distansia pa mira kon serio e situashon ta, prinsipalmente na e parti ariba di e konstrukshon ku e hendenan ku ta pará abou no ta mira. Einan ya kaba tin diferente parti a kuminsá bin abou. Te ariba tin un struktura di heru ku ta totalmente di frus i ku un momentu pa otro por bin abou. Komo ku e área ta unu kaminda salpeter ta penetrá fásilmente no tin duda ku mas tarda pa drecha e lugá, mas peligroso e situashon bira.

Na diferente okashon a trata di bende e hotèl i tabatin sierto perspektiva. Pero tur a redundá den un frakaso rotundo te awor aki no opstante promesanan ku tabatin. Hasta tabatin akuerdonan preliminar ku diferente kumpradó. Den tur kaso di benta te awor aki e kumpradó no por a kumpli, di manera ku e hotèl ku ta na un di e sitionan mas stratégiko di Punda, ta para ta putri. Ni di parti di Gobièrnu ni di parti di Girobank ku ta e promé benefisiario den kualke benta no ta dunando informashon mas for di algun siman kon ta pará ku e proseso pa sali for di e hotèl aki. Miéntras tantu a deterioro ta sigui, manera algun di e pòrtrètnan ta indiká.