WILLEMSTAD.- Durante di su promé reunion kuartal di miembresia, direktor di maneho di CHATA sra. Seferina – Rojas a presentá e prestashon di industria, proveé pa Ofisina di Turismo (CTB), indikando ku den di tres i di kuater kuartal di 2020 Kòrsou a risibí un total di 65,010 bishitante. Pa loke ta trata prestashon di hotèl, un averahe di 34.5% di kamber di hotèl tabata okupá, miéntras un tarifa diario promedio (ADR) di $135.48 a keda registrá pa e último dos kuartalnan di aña. Pa e mesun temporada, un averahe di $46.22 a keda registrá pa loke ta trata e entrada pa kamber disponibel (RevPAR). Pa luna di yanüari 2021, e resultado di CHATA su enkuesta tokante prestashon di hotèl ta indiká un okupashon di 20%, tarifa diario promedio (ADR) di $183,84 i entrada pa kamber disponibel (RevPAR) di $31.01. E representashon di hotèlnan ku a partisipá na e enkuesta tabata abou, esaki ta nifiká ku e sifranan lo no reflehá e situashon berdadero. Pues CHATA ta enkurashá i buta énfasis riba e importansia pa hotèlnan ku ta miembro hasi nan reportahe mensual pa asina por reportá sifranan bálido den futuro. Pa loke ta trata desaroyo di kamber pa e próksimo kuater añanan, por spera ku Kòrsou lo tin alrededor di 3,086 kamber adishonal ku tur proyektonan den desaroyo.