WILLEMSTAD.- Dia 5 di aprel próksimo pa 6or di atardi lo tin

un evento magno riba Brionplein titulá Manifestá. E evento aki ta posibel danki na House of Worship. E meta prinsipal di e evento ta pa selebrá e resurekshon di Kristu Hesus. Esaki lo ta a traves di kanto, baile, alabansa i adorashon. Lo tin vários grupo i kantante kristian manera entre otro Proskuneo i Willy Rodriquez.

Mas a leu e muchanan di HOW kids i muchanan balente lo presentá un show di mímika i baile i tambe un drama ku un mensahe profundo. E drama aki lo ilustrá e morto i resurekshon di Kristu.

Mirando ku e dia aki ta un dia di fiesta i lo no tin transporte públiko, House of Worship a sòru pa diferente ‘shuttle bus’.

Lo tin 4 diferente bùs repartí na diferente área di Kòrsou di forma ku tur persona ku ke eksperensiá e evento aki lo por yega di forma grátis.

4.30 di atardi lo tin un bùs na e plenchi di skol di Fuik kual ta Kolegio Mgr. Julio Henriquez, e di 2 bùs lo para na Margrietplein na Maripampoen, e di 3 bùs lo sali for di sentro di bario Seru di Papaya i por último lo tin un bùs na Bándabou kual ta sali for di e Iglesia House of Worship i esaki ta sali 4or.

Na final di e evento e bùsnan aki lo sali Brionplein 10or di anochi i lo regresá e punto kaminda ku nan a sali.

Lo tin algun shùrt tambe disponibel pa e evento aki.

Awe for di 9or di mainta te ku 4or di atardi lo por pasa na House of Worship na Erosweg i buska bo shùrt.

Tene kuenta ku esakinan ta disponibel miéntras ku tin den stòk.

Pueblo di Kòrsou ta keda kordialmente invitá na e evento Manifestá. Kòrda bai na tempu i bai ku bo stul pa asina disfrutá di un anochi bendishoná.