WILLEMSTAD.- Human Rights Defense Curaçao ta para pa protehá e derechinan humano di tur habitante di Kòrsou inklusive di e refugiadonan i migrantenan den krísis.

E muhénan i hòmbernan ta keda detené un i otro bia den sèlnan di imigrashon. E personanan aki ta keda aki durante di vários siman, luna i tin bia asta aña i mei. I den e sirkunstansianan hopi primitivo. E situashon den e sèlnan ta tristu i hopi bia tenso i e hendenan tin poko aktividat. I p’esei gerensia di SDKK a hasi un apelashon riba Human Rights Defense Curaçao pa por haña material rekreativo debí na e falta di rekursonan propio. E organisashon lokal di derechinan humano a pidi i a risibí finansa di e representashon di Ulanda na nòmber di ministerio di interior i relashonnan di reino. Esaki a bin di e fondonan pa proyektonan chikí i ku e fondo aki VNW ke kontribuí na promové e bienestar di e hendenan di Aruba, Kòrsou i St. Maarten.

Ayera un representante di e representashon di Defensa i derechinan humano a entregá un ekipo rekreativo i deportivo di instrumèntnan lokal na e hefe di Barak pa estranheronan. Nan a risibí  esaki ku entusiasmo. HRDC ta spera ku esaki lo yuda aliviá un poko e suerte di e personanan detené aki.

E personanan den Barak hopi bia tabatin hopi aña ta biba na Kòrsou i tabata traha den entre otro sektor di kuido, horeca òf pa kuida mucha. HRDC ta haña importante pa wak e efektonan positivo di nan presensia i kiko nan por  a kontribuí kuné na pais.