...E loke a sosodé marcha despedida dia 4 mart 2014 den Wishi...

WILLEMSTAD.- E kaso “Muraya di Karnaval” ta andando ketu bai den korte pa kaba di detektá e daño i perhuisio ku sra. Verginie-Rosalina ta demanda di gobièrnu pa e muraya ku a kai riba dje durante despedida di karnaval, i kual a kousa ku el a bira paralítiko.
For di 2019, hues a stipulá ku un eksperto lo investigá e asuntu di daño, tambe un eksperto di revalidashon lo investigá daño di sra. Verginie-Rosalina.
E eksperto laboral a duna un suma inisial di Naf.3100. algun luna despues e eksperto a bin ku otro tarifa, debí ku e trabounan ta hopi. El a presentá un suma di Naf.7050,-. Gobièrnu a indiká ku e suma ta haltu, pero hues a duna di konosé ku p’e e suma ta bon, i ademas e ta bon supstansiá. Hues a indiká ku gobièrnu tin di paga e suma aki mesora na e eksperto. Otro luna e kaso ta kontinuá, kaminda gobièrnu tin di mustra prueba ku el a paga e eksperto pa investigashon por kontinuá.
E kaso aki a sosodé 4 di mart 2014, kaminda sra. Verginie-Rosalina tabata para wak karnaval den Wishi, na momentu ku muraya di un parsela bandoná a kai riba su pia ku konsekuensia el a keda inválido.
Sra. Verginie-Rosalina a inisiá kaso kontra di gobièrnu eksigiendo pago di 2.353.612,40 florin (esta 2.3 mion florin), pasobra gobièrnu no tabata sufisiente diligente pa ku e muraya ku a kai riba su pia durante parada di karnaval na 2014. Gobièrnu di su banda ta kulpa Verginie di a bai para na e sitio riba su propio inisiativa. Tambe gobièrnu ta pone doño dje tereno i e muraya sr. Lobato komo ko-responsabel di su propiedat.
Den un sentensia di 2 novèmber 2016 Verginie ta gana kaso i ta haña un suma di 250 mil florin na vorskòt kual a keda pagá tambe dor di gobièrnu. Pero awor Verginie ta para riba ku ta 2.3 mion florin su gastunan total ta i ku gobièrnu tin di paga e suma korespondiente.
Den sentensia di dia 2 novèmber 2019, ya kaba korte a dikta ku gobièrnu a faya di sera e muraya aki ku tabata un peliger. Tabatin rapòrt di inspekshon ku ta indiká ku kualke momentu e muraya por a kai debí na su estado di deterioro pisa. Ademas e muraya ta keda na e stupi kaminda públiko ta para wak karnaval. Pa gobièrnu tabata sufisientemente bon kla ku tabatin un situashon peligroso na e sitio, i gobièrnu mester a tene kuenta kuné. Pues hues ta haña ku gobièrnu tin di kumpli ku e daño ku sra. Verginie a sufri di dje.
Despues e suma di sra. Verginie a yega e total di 2.7 mion florin repartí riba 13 punto di gastu. Mirando e disputa entre sra. Verginie i gobièrnu riba e daño i perhuisio, hues a buska ekspertonan pa evaluá embergadura di e puntonan di gastu aki, si ainda e ta sufri daño dor di e aksidente aki. Hues a disidí pa nombra eksperto laboral i dòkter di revalidashon lokal riba e kaso aki. E kaso ta kontinuá otro luna.