WILLEMSTAD.- Mr Geert Jan Knoops ta satisfecho ku tratamentu di e kaso di ekspropiá kontra di su klientenan Gerrit Schotte i su partner Cicely van der Dijs. OM a pidi korte pa ekspropiá un suma total di 2 mion dje pareha, kual plaka nan a enrikesé nan mes for di e kaso Babel. Satisfecho, pasobra hues a duna defensa i tambe Schotte tempu amplio pa mustra na inosensia den e kaso aki.

Den deklarashon pa EXTRA, mr Knoops a bisa ku tabata dos dia largu di tratamentu di kaso i importante. Na promé lugá mester duna kòmplimènt na korte ku a duna espasio pa Schotte i van der Dijs por a splika nan mes. Schotte a duna un presentashon dje trabou di  su fundashon, unda e plaka a bai. Banda di esei hues ta konosé e dokumentashon dje kaso i a hasi pregunta.

Komo defensa a ilustrá ku e ponensia di Ministerio Públiko (OM) ku outomátikamente e kaso Babel ta kondusí na ekspropiashon no ta korekto. Pasobra ainda e kaso Babel ta andando den korte di Kasashon. E kaso no ta irevokabel.  Mr Knoops ta kere ku tin un chèns ku korte di Kasashon lo por manda e kaso bèk na korte di apelashon. P’esei a hasi petishon na hues, ku si ke duna e pareha chèns, pa wanta e desishon den kaso di ekspropiá i warda sentensia den kaso Babel na korte di Kasashon.

Ounke ku mr Knoops no por mira futuro, pero segun su eksperensia, e ta kere ku tin un chèns riba promedio ku korte di Kasashon lo manda e kaso korte di apelashon. Pasombra tin hopi fout ku a ser hasi den aplikashon di lei, kaminda a laga e material di prueba na fabor di Schotte i van der Dijs un banda.

Mr Knoops a bisa ku si e sentensia no ta irevokabel e ora ei OM su kaso di ekspropiá no tin base. Nan ta kere ku den kuminsamentu di 2019 korte di kasashon lo dikta sentensia den kaso Babel.

“Figura bo si korte a tuma desishon den kaso di ekspropiá, i di otro banda korte di Kasashon manda e kaso korte apelashon, e ora ei tin un fase di ekspropiá ku ya a pasa. E pareha mester tin chèns pa atendé tur fase di e proseso”. E konsekuensia di e desishon di e kaso penal di ekspropiá i kasashon, lo ta ku e ora ei e kaso di OM no tin base.

“Sinembargo den pidimentu pa wanta e kaso, OM ta bisa ku komunidat di Kòrsou tin interes pa bin ku un sentensia. P’esei nos a puntr’e si el a hasi un enkuesta bou di komunidat di Kòrsou pa sa esaki. Ta importante ku e kaso ta kana korektamente i pa tin  prinsipio di un bon proseso”. Mr Knoops ta spera ku dia 30 ougùstùs korte lo no dikta sentensia, i warda te ora tin desishon di kasashon.

Hues mes a bisa ku e kaso tin su kompleksidat kuné, i kompletamente otro for di loke kuOM ta ventilá den komunidat, ku e pareha e enrikesé nan mes. “No outomátikamente hende kondena, ta nifiká ku el a probechá dje plaka personalmente, di akuerdo ku mr Knoops. “Nos a splika, i a mustra ku Schotte no a hinka ni un depchi pretu den su saku. Pero OM no  a hasi ningun pregunta riba esaki”.

“E kaso a dura hopi, kiko a bin afó nada, dos aña pasa e akountent forénsiko a investigá tur kos. E fluho di sèn a bai via di e sistema ekonómiko legal”.

Mr Knoops ta haña ta un lástima i tòg alarmante pa tur kompania aki na Kòrsou, ku OM ta bisa ku un hende ku tin un NV, BV, ku tur plaka ku ta bai den e kompania outomátikamente ta plaka priva. Si mira ondermeingsrecht i sivilrecht, ku un kompania tin su propio fondo, MFK tin su propio fondo. Si plaka bai den e kompania ta dje kompania i no ta algu priva. Nos a mustra ku plaka ku a ser usa  a bai den kompanianan i dor di esei niun hende a enrikesé nan mes. Tin rapòrt di akountent ku for di 2012 MFK tabata e promé partido polítiko na Kòrsou, ku a keda investigá i ta kompletamente legal, segun Knoops.

Finalmente el a  bisa di a traha ku un tim i eksperto forénsiko i nan ta mira ku no tin base pa ekspropiá. Nan tin konfiansa ku hues lo mira ku argumentonan ku OM a trese dilanti no tin base. Tratamentu di e kaso di parti korte tabata korektamente, i Hues a duna espasio na defensa i e akusadonan pa mustra lo kontrario dje akusashonnan, mr Knoops a bisa.