WILLEMSTAD.- Ayera korte di promé instansia a kondena e hóben  D’edison Soto Osorio di 23 aña, nasé na Colombia, na 15 aña di prizòn pa homisidio di e hóben di 18 aña D’Xiane Ogenia i tambe posishon di arma di kandela. Fiskal  a hasi demanda di 16 aña. Hues a honra e petishon di e suma di fl 12.609 komo daño perhuisio na  famianan di e víktima.

Hues a yama e kaso aki un “zinloos geweld”. Esta un asesinato sin ningun motibu. Hues ta apsolvé Soto Osorio di asesinato premeditá, pa motibu ku no tabatin sufisiente punto ku a determiná esaki. Ministerio Públiko tambe  a bai di akuerdo ku e ponensia. Loke si  korte ta haña probá, ku e akusado a tira tres biaha riba e víktima ku un arma di kandela, di kual esaki a kousa su morto. Esaki a base di e deklarashon di e akusado mes,  imágennan i tambe outopsia.

Abogado di e akusado mr. Athene Sulvaran a  bisa ku ta trata di un akto di defensa propio. Korte ayera a  rechasá e ponensia aki. Korte a tuma den konsiderashon ku riba e imágennan di e insidente por a mira ku e komportashon di e akusado di kuminsamentu te final tabata di un manera agresivo i atakante den direkshon di esun ku a bira víktima i un amigu di esaki. For di momentu ku e akusado tabata kana den direkshon di esun ku a bira víktima i su amigu e komportashon di e akusado tabata pa inisiá un konfrontashon.

E hóben ku despues a bira víktima, ta esun ku a purba di evitá un eskalashon, pero e akusado a provoká i ta kuminsá un pelea. Mirando esakinan korte ta duna di konosé ku bou di e kondishonnan aki e akusado no por basa su defensa riba ‘noodweer’ òf ‘noodweerexces’.