WILLEMSTAD.- Korte Superior a konsiderá “Ge” Bonifacio su ròl hopi pisá den kaso asesinato na Fuik. Den e veredikto korte a duna di konos’é ku korte no a kere e loke el a deklará tantu na polis komo den korte ku e ta inosente.  E akusado  Gerswin  Bonifacio tambe a keda kondená na 16 aña den korte di apelashon den e kaso “Scooter”. Ta  trata di e kaso kaminda e víktima  Antonio “Beat” Paulina di 22 aña a keda tirá pa un di e grupo di hòmber ku a bin su kas pa busk’é akusando e  di ladronisia di skuter. Paulina ta wòrdu alkansá pa un proyektil  ku a resultá den su garganta  ku konsekuensia fatal dia 20 di mei 2015. Bonifacio tambe a apelá su sentensia pa motibu ku e ta para riba su inosensia, i a bisa ku e no tabata  den bisindario di e área ei. Bonifacio a bisa ku tur loke Juliana a deklará ta mentira i ku nan dos pa basta tempu no ta ni papia ku otro pa motibu di un kadena ku e ta sospechá Juliana di a hòrta. Segun Ministerio Públiko Bonifacio meskos ku tur e otronan lo a biaha pa Ulanda despues di e asesinato pa asina hui for di hustisia.

Bonifacio a deklará ku e tabata serka su frei drumí malu i no a sali mes te anochi. Abogado Blonk ku a hiba e defensa pa e akusado a bisa ku su kliente ta inosente i ku e no tin nada di aber ku e kaso. Segun e abogado e motibu ku su kliente a bai Ulanda tabata pasó su bisiña  a tira riba dje un bia i pa evitá mas problema su mama a bis’é pa mihó e bai.  E abogado ta pidi pa apsolv’é su kliente for di tur kulpa pa motibu ku no tin niun prueba konkreto kontra dje. Tambe e abogado a pidi e tribunal si akaso nan dun’é un kastigu  hasi esaki un gran parti kondishonal. E tribunal di korte di apelashon ayera a duna di konos’é ku mirando e deklarashonnan di tantu Juliana i e otro testigunan, korte ta konkluí ku Juliana  ta un di e sospechosonan prinsipal  i ku e korte no por a saka afó ken ta esun ku a lòs e tiru fatal. Korte a duna di konos’é ku Bonifacio huntu ku Andrade a dura 3 ora buskando esun ku lo mester a hòrta e  skuter. Korte no a kere e historia ku akusado tabata drumí na kas di su frei mirando e dama su deklarashon na hues komisario no ta kuadra ku loke Bonifacio a deklará. Korte ta bai di akuerdo ku e deklarashonnan di Juliana kaminda e ta inkriminá tantu su mes komo e akusadonan inklusivo Bonifacio. Korte ta haña ku Bonifacio su ròl tabata hopi pisá den e kaso aki i ta konsider’é di por ta un di esun ku a tira Paulina mata. Korte di apelashon mirando esaki ta bai di akuerdo ku e kondena di korte di promé instansia.