WILLEMSTAD.- Federashon Futbol Korsou (FFK) i eks-direktor tekniko di selekshon Remko Bicentini, a yega na un akuerdo pa kiebro di kontrakt. Awe mainta den sala di Korte hues mr. Lasten a duna e partidonan espasio di tempu pa nan yega na un akuerdo despues di a skucha di ponensianan di ambos banda.

Bicentini  tabatin abogado mr. Henriquez den su banda, pero ku e intenshon ku dos abogado for di Hulanda lo a hiba su defensa via di video-conference. A resultá, sinembargo, ku e abogadonan hulandes no a reakshoná riba un mail ku e hues a dirigi na nan persona pa di forma ofisial nan solisitá pa hiba e defensa. Konsekuentemente, ningun di dos no por a hiba palabra i mester a limitá nan mes na skucha lokual mr. Henriquez a trese dilanti.

Di parti di FFK abogado mr. Diaz a skuif e bala den e mitar tereno di abogado di Bicentini. Tabata despues ku esaki a trese su puntonan dilanti, ku mr. Diaz a hiba palabra.

Despues di a skucha ambos parti, hues sra. Lasten a trese dilanti ku e ke duna partidonan oportunidat pa papia ku otro, promé ku e tin ku tuma un desishon. Despues di un 'break' pa e "negosashon" por a tuma lugá den un otro sala, e partidonan a yega na un akuerdo i asina evitá ku Korte mester a tuma un desishon.

Mas informashon den EXTRA di mayan.