WILLEMSTAD.- Ayera durante tratamentu di e kaso di intento di asesinato di kual e hóben akusado R. Hansen (20) ta keda akusá di dje, hues a opta pa proponé e kaso pa papia ku e víktima. Hansen ta keda akusá di a tira su mihó amigu di fam Bart dia 28 di yüli 2020.
Hansen a ninga ayera di e tira su amigu intenshonalmente. El a insistí ku ta trata di un insidente, miéntras e víktima ta para riba ku Hansen a tira dirigí riba dje sin motibu.
Hansen na su turno a bisa ayera ku pa di promé, kon e ta hasi tira un hende den kurá di kas di su mama.
Ora bala a kue Bart, el a bisa su amigu pa keda trankil pasó su mama ta traha den kuido i sa kon pa yud’é. Segun deklarashon di e mama, e dia ei el a tende un zonido hopi duru. Ora el a bai wak pafó, el a mira un kantidat di hende riba su tereno di kas.
Despues ku el a skucha e zonido, e no a wak su yu mas.
Hues a revelá ku na 2019 e akusado a haña un otro tipo di kastigu di kual 18 luna a keda kologá riba su kabes.
Pa di dos bia Hansen ta sinta dilanti hues den ménos ku 2 aña.
Ora ku hues tabata pasa den situashon personal di e akusado, hues a nota ku e tabata bira hopi nèrvioso. Hansen a bisa ku e no gusta pa papia di su bida privá.
Na chikí el a mira kon nan a drenta su kas, bati su mama i fo’i e dia ei no ta trankil pasó nada no a bin afó.
El a bisa ku e tin dos ruman ku ta sintando kastigu di 20 i 25 aña pa asesinato. Tur kos ku pasa, hende ta keda papia di e famia Hansen. Segun e akusado tur e kosnan ei tin e kansá.
Fo’i chikitu e mester a bai ‘Skuchami’ etc, despues ku el a para mira nan bati su mama.
El a atmití di tabata usa hopi molly i mariwana, pa baha su strès, pero despues a stòp.
Fiskal Jansen a bisa ku polis a revelá ku e akusado ta miembro di un gèng ku yama “No Limit For Ever”. Segun polis nan a mira un prek ku e nòmber ei riba su pechu.
E akusado a ninga redondamente i a bisa pa no involukr’é ku niun gèng. Mas aleu hues a bisa ku despues di e akto, e akusado kier a bula den laman pasó el a kere ku su amigu a muri.
Segun Hansen si e kier a mata Bart, lo el a venen’é pasó hopi bia e sa kushina pe, òf ora el a kai abou, e lo a yen’é ku mas bala.
Fiskal Jansen a bisa ku e loke a pasa ta kompletamente probá, a base di e deklarashonnan di e víktima i e rapòrt di dòkter.
Mirando esaki fiskal a konsiderá e echo komo intento di asesinato i a yega na un demanda di 7 aña pa Hansen.
Abogado Eustatius a bisa den su defensa entre otro, ku korte tin ku apsolvé su kliente pa intento di asesinato.
Segun e abogado ta trata di dos amigu di fo’i chikí i hamas Hansen su intenshon tabata pa tira su amigu. E abogado a insistí ku mester mira e kaso komo un insidente.
Despues ku hues a bai deliberá, el a bin bèk i bisa ku p’e e kaso ta poko straño. P’esei e ke skucha e víktima, pa sa di dje kiko a pasa.
Hues a bisa ku e ke pa tantu e komo fiskal wak ekspreshon di e víktima, ora e ta konta e suseso. P’esei e ta pospon’é e kaso pa djaluna awor i pa laga buska e víktima pa bin korte i testiguá promé e tuma su desishon.