WILLEMSTAD.-  Ayera durante tratamentu di un kaso di inmoralidat di menor, hues Verbeek a bai di akuerdo ku  fiskal Dennaoui-Simon i a kondená e akusado na 6 aña di kastigu den prisòn.

Ta trata di  e hòmber R.P. (38)  ku ta keda akusá di tabata kometé akto di inmoralidat ku su propio dos yunan muhé.

E yu muhé prinsipal tabatin 12 aña dia e tata a kuminsá mishi kuné. Segun e deklarashon di e yu, tur dia e tabata hasi sèks kuné  te dia ku el a hasi 14 aña.

El a pone su mama na altura vários bia, pero e mama a neglishá i no a hasi nada. Tur famia ku polisnan a interogá  a bisa ku un i tur  sa ku e akusado tabata drumi ku su yunan muhé biológiko.

Pa loke ta trata e otro yu muhé ku awor tin 16 aña, el a konta su ruman ku su tata tambe a mishi kuné, pero el a bis’é pa stòp sino e lo mat’é. E yu aki no tabata ke pa hasi denunsia riba e tata, pa motibu ku e tata ta trese kuminda den kas. Dia 2 di yüli último, e tata a maltratá e yu muhé prinsipal ku un palu basora te kibr’é den su lomba, pa motibu ku e no a kumpli ku e tareanan di kas. E tata ayera a atmití tur e akusashonnan i a bisa ku e ta lamentá i tin bèrgwensa pa loke el a hasi. Segun rapòrt di Reclassering, sikiátriko i sikológiko, e akusado tin un grado di inteligensia hopi abou, e ta analfabeto i no por konsider’é kompletamente responsabel pa su akto. E ta adikto na  mariwana i ta usa hopi alkohòl.

Fiskal den su rekisitorio a bisa ku ta trata di un kaso hopi tristu i lamentabel kaminda un yu ta wòrdu violá pa su mes tata tur dia pa 2 aña largu. Praktikamente henter famia tabata na altura inkluso su mama i wela, pero niun hende a hasi nada. Despues ku su tata a agredié ku palu basora den su lomba, e yu su kana a yena i esaki a dun’é e forsa pa e mes yama polis i hasi denunsia, pasó e no tabatin sosten ni di su mama. Estando na polis, el a konta tur kos ku su tata tabata hasi ku nan. Su ruman no kier hasi denunsia pasó e kas no tin awa, ni koriente i e tata tabata esun ku ta sòru pa nan kome. Fiskal ta lamentá ku e mama nunka a hasi algu pa su yu, sabiendo kiko tabata pasando.

Fiskal a bisa ku e akusado tabata esun ku mester a protehá e yu kontra tipo di aktonan asin’aki komo tata, pero netamente ta esun ku tabata kometé  inmoralidat ku su yu.

Banda di e abusunan seksual, fiskal a kuestioná e echo ku e akusado a agredí su yu ku palu.

Fiskal a bisa ku ta prohibí pa bati un mucha di e forma ei. Fiskal ta lamentá ku e otro yu muhé no kier a hasi denunsia  i a limitá di papia e loke e tata tabata hasi kuné. P’esei fiskal no por komprobá ku e akusado a tene relashon ku e otro ruman muhé, pero si a mishi kuné. Pero pa loke ta trata e yu ku a hasi denunsia fiskal a bisa ku e aktonan di inmoralidat por keda komprobá a base di e deklarashonnan di e víktima mes i tambe di e tata ku a atmití su echo.

Mirando esaki fiskal a yega na un demanda di 6 aña di kastigu pa e akusado .

Hues Verbeek den su desishon a bisa ku ta trata di un kaso hopi grave i si e bai tras di e rapòrtnan sikiátriko i sikológiko e kastigu mester baha na 4 aña. Pero mirando e gravedat di e kaso, e ta haña 4 aña demasiado abou. P’esei e ta  bai di akuerdo ku e demanda di fiskal di 6 aña kastigu prizòn.