Despues ku el a bisa pa dun’é chèns i mustra ku e ta kla ku kai será

WILLEMSTAD.- E residivista K. Attaf (27) a bolbe haña un chèns serka hues i por a bai kas bou di atvertensia i vários kondishonnan ku e mester tene kuenta kuné.
E akusado a presentá den sala di korte pa responsabilisá su mes pa su akto.
K. Attaf ta bon konosí pa hustisia. E ta keda akusá pa menasá miembro di su famia ku morto dor di bisa “bo sa kuantu kos un hende riba kaya por hasi”.
Tambe e ta keda akusá pa poseshon di 15 mata di mariwana dia 6 di yanüari 2021.
Attaf ta keda akusá di a agredí e víktima di fam Martis ku moketa dia 8 di desèmber 2020.
El a hasi esaki dor di kue Martis den kabei, batié ku moketa den kara, kabes i tambe ku skòp.
Esei a pone ku Martis a kai abou i a sufri leshonnan serio na su kurpa i tabatin basta doló.
Attaf ta keda akusá tambe di tabatin 80 mata di mariwana dia 4 di mart 2020 den su poder.
Pa loke ta trata otro akusashon, Attaf ta keda akusá di a menasá 2 otro miembro di su famia ku morto dia 24 di febrüari 2020 dor di usa un machete.
El a bisa nan “Mi ta mata bosnan”. “Kap mi ta kap bosnan mata”. “Mi ta mata bo yu”. “Bai lihé pa mi no mata bosnan”. “Mata mi ta mata bosnan”.
Ministerio Públiko ta akus’é tambe di a menasá un trahadó di botika ku e lo mat’é den e palabranan: “Mata mi ta mata bo”. “Bo no ta skapa mi’. ‘Bono sa ken mi ta”.
Attaf a bisa ku e tabata hopi rabiá dia ku el a menasá su famia. Segun su tata, e akusado a bisa kosnan hopi mahoso i tabatin algu den su man. Anochi e tabata manda hopi “app” menasante pa nan.
Riba esaki Attaf a bisa ku el a papia ku su famia i awor tur kos ta tras di lomba.
Pa loke ta trata e matanan di mariwana, e akusado a bisa ku e ta usa nan pa su malesa di epilepsia.
E loke a pasa na botika hues a splika ku nan no tabatin un remedi ku el a pidi i esei a pone ku e akusado a bira furioso i bula tras di e tonbank.
E dama víktima a bisa ku el a drenta den su kantor i sera e porta. Segun e víktima e akusado a menas’é i a bis’é ku e lo mat’é. Attaf a bisa ku e no ta kòrda e suseso ei i kisas ta e konsekuensia di e uso di e píldoranan ku e ta usa.
Fiskal a haña e akusashon di menasa di e famianan, e plantashon di mariwana i e menasa di e víktima na botika probá.
Fiskal a tene kuenta ku e akusado tabata kana den su periodo di prueba despues ku na 2018 el a keda kondená pa ekstorshon. Mirando esaki fiskal a pidi pa ehekutá e 18 luna ku tabatin kologá riba su kabes òf alargá su temporada di prueba.
E akusado den su último palabra a bisa ku awor si e ta kla ku e bida ei pasó e no ke sigui kai será mas i ke un chèns pa e demostrá esei.
Hues a duna di konosé ku e ta kontentu ku e akusado mes a bisa ku e ta kla ku prizòn i ku e ta spera ku e tin e na serio.
Hues a bis’é ku e ta bai dun’é un chèns i ta spera ku e lo hasi bon uso di dje.
Mirando esaki hues a konden’é na 140 dia di kual 135 kondishonal.
En bes di e sinta e 18 luna nan ku tabata kologá riba su kabes, hues a alargá e temporada di prueba ku 2 aña mas. Pues Attaf por a bai kas bou di vários kondishon i a keda atvertí pa no kometé niun echo kastigabel.