WILLEMSTAD.-  Un menor di edat ayera a presentá den sala di korte huntu ku su tata akusá di a kore “sea do” sin  “vaarbewijs”.

Segun e akusashon dia 15 novèmber 2020 e tim di Warda Kosta a para un menor riba “sea doo” den área di “Fuik baai”.

El a bisa e “sea doo” tabata di un amigu su tata, i e kier a bai dal un rònchi su so riba dje.

Durante tratamentu di e kaso, e menor a pidi hues si e por haña chèns kual hues a bis’e ku esei sigur por.

Su tata a bisa ku e ta haña un lástima ku kosnan a bai asin’ei. El a bisa di a splika su yu ku e no mag kore ku su edat.

Fiskal den su rekisitorio a duna di konosé ku e loke e menor a hasi ta hopi peligroso. Pa motibu ku meskos tin reglanan den tráfiko riba karetera, tin regla tambe riba laman mirando ku tin mas “sea doo” ta kore rònt i hendenan ku ta landa.  Banda ku e menor no tabatin su “vaarbewijs”  e  “sea do” no tabatin su papel di kùr bálido.

Fiskal a splika ku apesar ku e hóben ta di edat hopi chikí no por kita ku el a kometé un echo kastigabel.  Mirando esakinan, fiskal a yega na un demanda di 650 florin total di but di kual 325 kondishonal mas periodo di prueba di 1 aña.

Hues den su desishon a bisa bèrdat e menor a kometé un fayo dor di kore sin papel di kùr i sin “vaarbewijs”, pero hues ta haña ku e ta yòn i no sa presis kon e leinan ta hinká den otro manera un adulto.

Hues ta haña ku e adultonan rondó di dje mester a bis’e ku no por.. Mirando tur esakinan hues a haña ku el a hasi algu robes, pero a apsolvé di but.

Hues a bisa e menor ku e ta spera ku el a siña su lès.