WILLEMSTAD.- Korte di promé instansia a trata kaso di Ministerio Públiko kontra T. Eustatius(31) ku ta representá Fundashon Doing Good.
Segun Ministerio Públiko nan tabata bende lòt sin pèrmit, den periodo di aprel 2019.
Ta trata di lòtnan ku tabata bende un E-book i e persona por a gana un kas.
Dado momento Gaming Control Board a para e loteria di e Fundashon. Nan a bai Beep beep i “24 uur uit de muur“ kaminda a konfiská mas di 18 mil florin i tambe e buki nan di lòt.
Ministerio públiko a pone beslag riba lòt i sèn di e fundashon.
E kaso finalmente despues di 2 aña e kaso a bin dilanti den korte penal. E kaso a keda posponé pa motibu ku abogadonan Da Costa Gomez i Eustatius a pidi pa skucha 3 polis bou di huramentashon.
Ta trata di e polisnan Li, Sille i Geertruida. Segun e defensa, den e prosès verbal e polisnan a deklará ku den un artíkulo ku a sali den Antiliaans Dagblad riba 5 di aprel 2019, nan a bai e punto nan di benta pa pone beslag. Segun e defensa e artíkulo a sali dia 6 di aprel, pues riba 5 di aprel no por ta posibel ku e polisnan enkuestion a tuma nota di e artíkulo den korant. Mirando esaki e defensa a pidi pa skucha e 3 testigunan di kual hues a honra e petishon.
Hues a bisa tin kos nan ku ta para den e prosèsverbal di Ministerio Públiko ku e ke mas klaridat riba dje .
E tres testigu nan aki ta e 3 polisnan aki ku supuestamente a mira un artíkulo den korant.