WILLEMSTAD.- Hues van Lieshout  ayera a rechasá pa suspend’é detenshon  di Louisyn Yeung (49) relashoná e  problema ku su wowo.

Den un huisio sumario abogado Sulvaran  a bisa ku Yeung ta siegu na un banda di wowo i ta mira 20 % ku esun robes, miéntras e wowo drechi ta mira apénas ku 5 %. Segun e abogado for di 2019 Yeung ta na man di un spesialista di wowo renombrá na Colombia. Pa motibu di Covid e no por a biaha bai bèk i mester a interumpí su tratamentu. Dia 30 di yüni 2020 el a keda detené . Na komienso di su detenshon dr Palm spesialista di wowo a dun’e tratamentu i a bisa ku e mester bolbe bin bèk despues di 3 luna pa kontròl, pero esaki no a sosodé. Konsekuensia ta ku e akusado a haña un derame di sanger basta fuerte dia 16 di desèmber  último na su wowo robes. A hiba Yeung  inmediatamente pa un otro spesialista ku e momento ei tabata na warda. Dr Palm a purba haña Yeung serka dje despues, pero esei a sosodé te 13 di yanüari último.

Esaki a trese konsekuensia serio pa su wowo i si e no bai Colombia na tempu, e tin chèns di pèrdè su wowo, segun e abogado.

El a siguí bisa ku den SDKK e kuido no ta optimal i pa un periodo largu no tin un dòkter disponibel den e instituto.

Segun e abogado ora ku a detené Yeung, no a wak su situashon. Nan ta mara su pia i su wowo i trat’e manera un kriminal super peligroso.

Banda esaki e abogado a bisa ku e instituto a kuminsá bira fèrfelu pe,  pa motibu ku su ruman i su yu hòmber ku tambe ta será kuné mester yud’e yena hèmber di awa i basha pe  ora e kaba di hasi sushi. Segun e abogado esaki no ta  e mihó sistema pa trata un ser humano den e situashon aki.

Ayera hues van Lieshout a bisa den su veredikto  ku abase di e informashonnan aki no por papia di situashon di emergensia, ni ku e situashon médiko no ta optimal  òf  pa motibu ku su estadia den prizòn ta malu e por pèrdè su bista. Segun hues  for di un rapòrt datá dia 8 di febrüari 2021,  dr Palm a bisa di a wak e akusado su wowonan di kual el a saka afó ku e tin un problema diabétiko i a sugirié pa  e haña tratamentu ku drùpel i sistema di laser. El a bisa ku a konstatá sanger bèrdat den e wowo robes pero pa 20% e no ta bai kambia.

E dòkter a bisa e akusado ku e sanger mester bai i despues por laser e wowo i esei por sosodé na Kòrsou mes, pero e akusado no ta kere den médikonan aki na Kòrsou i ke bai Colombia pa e tratamentu.

Segun hues mas aleu, for di e reportahe di e dòkter el a konkluí ku e akusado ta hañando trato médiko adekuá aktualmente pa su wowo. Pa otro tratamentunan nesesario e por haña esakinan tambe aki na Kòrsou mes i por pidi esaki kada bes ku e sinti ta nesesario na e pèrsonal di SDKK.

Pues hues a bari tur e argumentonan kompletamente for di mesa. Mirando tur esaki nan hues ta rechasá e ponensia pa “skors” detenshon di e akusado pa motibu di su salú.