WILLEMSTAD.- Sin duda e huida masal di hòmbernan indokumentá na barak ta keda un misterio. E indokumentadonan a logra bati i traha un buraku den e muraya di betòn pa asina nan por a logra skapa sin ku ningun polis a tende òf mira algu.

For di lokual EXTRA por a komprondé, tabatin algun dia ku e indokumentadonan tabata hasiendo èkstra bochincha i bati ku diferente opheto duru. Hasta djaluna nan tabata kanta himno di Venezuela. E bochincha di oranan largu tabata molestiá bisiñanan mes den e área di Koraal Specht. Probablemente nan tabata hasi bochincha pa asina despistá outoridatnan for di e grupo ku tabata kreando e buraku. Ora a deskubrí e huida, polis a kuminsá ku búskeda den e área pero sin e resultado deseá.

Algun ora despues polis a haña informashon di un kompania privá di seguridat, ku nan a topa un di e hòmbernan aki riba Dr. W.P. Maalweg. Durante di su huida e mester a lastimá su mes di tal manera ku e mester a haña tratamentu médiko na C.M.C. Esaki ta nifiká ku e 16 otro hòmbernan ainda ta riba kaya sin ku nan a keda detené.

E departamento di barak ta kai direktamente bou di Kuerpo Polisial i ta polisnan ta vigilá e departamento aki.

Awor investigashon tin ku kana su kaminda pa asina por saka afó kon bin ningun polis no a mira òf tende nada durante e oranan.