Akusado tin problema serio ku bista

WILLEMSTAD. - Abogado Peppie Sulvaran ta bai entamá huisio sumario penal kontra Ministerio Públiko (OM) pa pidi suspenshon di detenshon di e akusado Louisyn Yeung (49). E huisio sumario ta bin despues ku hues Eskes a bai  akuerdo ku fiskal Jansen durante tratamentu pro forma i a rechasá e petishon pa suspenshon di nan detenshon. Dia e kaso a keda presentá pro forma Louisyn tabatin un brel pretu di solo na su wowo.

Louisyn a bisa durante tratamentu pro forma ku e ta mitar siegu na un wowo miéntras e otro wowo no ta wak mas.

E akusadonan a keda detené relashoná ku un investigashon ku a haña e nòmber “Play Boy”, kual ámbos ta keda akusá di por lo ménos 7 akusashon.

Ta trata di poseshon di revòlver, 176160 gram di koka dia 10 di ougùstùs 2019.

Tambe nan ta keda akusá ku den e periodo di 30 di yüni 2020 nan tabatin un kantidat di 28755 gram di mariwana, un Glock 26, mas 21 bala.

Ministerio Públiko ta akusá e duo aki di ta metí tambe den e kaso ku a haña e nòmber “Toren”.

Den e investigashonnan aki, nan ta wòrdu akusá di tabatin 7 arma potente, 226  bala na tur di diferente arma, 18 bala di hagel, 182265 gram di koka i 11320 gram di mariwana dia 13 di sèptèmber 2016.

Pa loke ta trata e di 6 akusashon, ámbos ta keda akusá di tabatin 23786 gram di mariwana dia 30 di yüni 2019 mas munishon.

E akusashon 7 ta relashoná ku un entrada hudisial ku a tuma lugá dia 9 di ougùstùs 2019. Tabata un entrada hudisial maratóniko ku a dura mas di un dia i mei, ku a kondusí na un lote grandi di kokaina ku tabata bon derá bou di tera.

Polis a topa diferente bulto di kokaina ku a suma e kantidat di 176 kilo i 1 arma di kandela. Dos vehíkulo tambe a keda konfiská, den kuadro di e investigashon.

E akusado Louisyn, aparentemente tin problema serio ku su bista i den prizòn e no ta hañando e kuido médiko nesesario.

Su abogado Peppie Sulvaran a splika esei anteriormente i a bai hopi amplio den su splikashon pa asina konvensé korte pa pone Louisyn den libertat temporal bou di kondishonnan.

Hues no a bai di akuerdo ku e petishon di Sulvaran pa pone e sospechoso den libertat.

Esaki a pone ku próksimamente Sulvaran ta bolbe hasi un petishon pa posponé detenshon di Louisyn.

Tratamentu di e kaso penal ta planiá pa 26 di febrüari benidero.