Promentòn – sorto i uso

Tin yen sorto di promentòn. Tin esnan grandi ku un smak sut, di forma rondó òf largu ku diameter di un apelsina i ku nos konosé komo promentòn (ingles Sweet Pepper, ulandes Paprika) i esnan mas chikí hopi biaha puntá (na ingles Hot Pepper òf Chili pepper, na ulandes peper) ku nos konosé komo promèntè òf pika.

Nan ta pertenesé na e famia di Solanaceae, género Capsicum. Denter di e género akí ta haña hopi sorto. I pa kada sorto bo ta bolbe haña hopi variedat. Tin un par di míles di variedat di promentòn i diariamente tin mas ta bin aserka.

Ta eksistí un ‘skal di grado pikante” pa promèntè, e skal di Scoville. Pa e skal di Scoville ta midi e kantidat di capsaisina den e fruta. Ta usa capsaisina tambe pa traha tur sorto di salfi ku ta keinta nos kueru ora nos tin doló di múskulo. Promentòn ta skor 0 riba e skal di Scoville, miéntras Tabasco ta skor 5000. Pepperspray ku polis ta uza ta skor 2 te 5 mil.

E promèntènan di mas pika ta skor riba 2.000.000 riba e skal ei. Aktualmente,  Carolina Reaper ta esun di mas pika ku nan a klasifiká ku 2.2 mion.

Nos promèntè di Kòrsou, ku un grandura di 3 pa 5 cm i ku forma di promentòn ku kolónan di bèrdè kla te kòrá, ku un skor di 350.000 riba e skal di Scoville ta na un posishon intermedio.

Básikamente, promentòn bèrdè ku nos tin kustumber di kome ta un fruta ku no a hecha ainda. Ora e frutanan keda mas largu na e mata, nan ta haña nan koló hechu ku, dependiendo di e sorto, mayoria biaha ta kòrá, hel òf oraño. Ora e frutanan no ta hechu, nan ta smak un tiki pikante. Mayoria biaha ora e frutanan ta mas hechu, nan ta mas sut i fuerte.

Na Kòrsou e pedido di mas grandi riba merkado ta pa promentòn bèrdè i lokalmente esaki ta esun ku mas ta kultivá. Kasi por bisa ku Kòrsou ta outosuministrá promentòn bèrdè. Bou di bon sirkunstansia, esta temperatura abou i spesialmente anochinan fresku, e frutanan ta bira grandi i ku kaska diki. Ora e temperatura subi, e mata lo tin difikultat pa produsí fruta bunita ainda i e frutanan ta bira mas chikí. Dor di kultivá promentòn den un kas di kultivo, kaminda ta duna e matanan un kuido hopi mas intensivo, e frutanan por ta mas grandi durante hinter aña.

Generalmente nos mester siña aseptá na Kòrsou tambe ku si nos ta kultivá un produkto pa suministrá merkado, nos lo bai tin tur e diferente kalidatnan riba merkado. E kalidat di eksportashon, ku nos a kustumá di importá, pero tambe di 2 i di 3 kalidat, loke ta inherente na outosuministro.

Ora ku warda promentòn i promèntè pafó di frishidèr, nan ta keda fresku te 1 pa 2 dia. Sinembargo, den frishidèr por warda nan sigur 1 pa 2 siman ora ku hinka nan den un saku di plèstik ku buraku chikí.

Por fris promentòn tambe, despues ku saka e simianan i e kargadó di simia i kòrta nan den blòki blòki. Por kushiná i stoba e blòkinan di promentòn ora nan ta di fris ainda tambe.

Por fris warda promèntè pika hinté, despues ku kita e stelchi bèrdè.

Ta usa promentòn hopi den pizza, tantu promentòn rondó komo promentòn puntá, hopi biaha despues ku a grel nan. Ta eksistí tambe, un kòktel di promentòn ku òf sin meskla di alkohòl. Den salada, por añadí promentòn dor di kòrt’é na pida pida, blènder e, has’é òf grel e.