WILLEMSTAD.- Komishon fiho di Finansa di parlamento hulandes dia 9 di aprel a publiká kontesta ku nan a haña for di minister di Finansa di Hulanda riba nan preguntanan. Komishon a manda diferente preguntanan na minister tokante presupuesto di gabinete hulandes. Entre otro relashoná ku e pakete di invershon den nos estado di derecho. Pa Kòrsou i e otro paisnan Karibense den Reino Hulandes e ta nifiká ku Hulanda a reservá hopi miónes pa e siguiente añanan. Bou di tópiko di invershon den nos estado di derecho ta kai entre otro reforsá di supervishon di frontera (inkluí Wardakosta), profeshonalisashon di Milisia di Kòrsou i trayekto di formashon sosial. Pa 2021 Hulanda a reservá 18.3 mion pa esaki, pa aña 2022 a reservá 19.6 mion, pa 2023 19.5 mion ta reservá i pa 2024 19.6 mion ta reservá. Den e aña despues e kantidat di sèn lo oumentá konsiderabel. Ta reservá 24.9 mion pa aña 2025. Den e aña sèn ta reservá pa reforsá di supervishon di frontera (18.5 mion), un sistema duradero di mina atake riba nos estado di derecho (5.2 mion) i profeshonalisashon di Milisia di Kòrsou i trayekto di formashon sosial (1.2 mion). Pa aña 2026 ta reservá e mesun montante.
Pa Aruba tambe ta reservá montante pa kada aña te 2026 pa reforsá supervishon di frontera, pa un sistema duradero di mina atake riba nos estado di derecho i profeshonalisashon di Milisa di Aruba i un trayekto di formashon sosial. E montante ku ta reserva pa esaki pa Aruba ta 12.5 mion den 2021, 15 mion den 2022, 14.4 mion den 2023, 14.9 mion den 2024, 17.8 mion den 2025 i 17.8 mion den 2026.
Pa St. Maarten a reservá solamente sèn pa reforsá supervishon di frontera, ku ta 2.7 mion pa 2021, 2.9 mion pa 2022, 2.7 mion pa 2023, 2.4 mion pa 2024, 2,7 mion pa 2025 i 2,7 pa 2026.
Esaki ta nifiká ku pa e añanan 2021-2026 Hulanda a reservá un montante di mas ku 235 mion euro pa kontròl riba nos estado di derecho na Kòrsou, Aruba i St. Maarten. Den total kasi 175 mion euro ta solamente pa reforsá supervishon di frontera, ku ta inkluí trabou di Wardakosta.