WILLEMSTAD.- ‘Sin duda, e tópiko di vírus di Corona ta dominá den tur aspekto di gobernashon I den nos komunidat. Den aña 2021 tambe lo tin hopi atenshon pa Corona.’ Asina minister Zita Jesus-Leito (Salubridat, Medio Ambiente i Naturalesa) a bisa djabièrnè último den reunion virtual di Parlamento di Kòrsou tokante presupuesto di su ministerio pa aña 2021.
Segun Jesus-Leito vírus di Corona i medidanan di prevenshon riba tereno di salubridat públiko ku a keda introdusí i ehersé, tabatin efektonan grandi riba nos tur. ‘No solamente e efektonan general riba tereno di salubridat, ekonomia i sosial. Pero tambe kon nos ta biba i komuniká un ku otro. Riba tereno polítiko, empresarial, kolegial, den bario i tambe den núkleo familiar nos por a mira esaki. Por ehèmpel kon nos ta selebrá fiestanan di fin di aña.’
Segun minister di Salubridat, Medio Ambiente i Naturalesa ta importante pa kada un di nos tuma responsabilidat personal. Pa asina nos por protehá nos mes i evitá ku mas medidanan lo wòrdu imponé i ehersé. I asina lo afektá nos tur.
‘Gobièrnu ta traha riba tereno di COVID-19 den estrecho kolaborashon ku Aruba, Sint Maarten i Hulanda. Pa kompartí konosementu i eksperensia riba e tereno aki, ku ta algu nobo pa nos tur. Pero tambe den koperashon riba tereno di kuido, èkstra kapasidat na personal di kuido, pero tambe pa yuda den tèstmentu, monitoriá i duna feedback. Hulanda lo pèrkurá pa nos paisnan ta den e proménan ku lo partisipá den e lote di vakunashon kontra COVID-19 ku lo bira disponibel.’
Den e kuadro aki gobièrnu ya kaba a instalá un grupo di proyekto enkargá ku organisashon, distribushon i seguridat di vakunashon kontra COVID-19 riba nos isla.