WILLEMSTAD.- Minister hulandes di Asuntunan di eksterior Stef Blok ta ninga ku Hulanda a duna sosten finansiero na Venezuela. Uniko kos ku Hulanda a hasi, segun Blok, ta pa duna sosten finansiero na organisashon lokal i internashonal ku ta traha pa mehorá derecho humano i situashon humanitario den e pais. Segun Blok Hulanda den e último aña a duna 2 mion euro na e organisashon UNICEF. Segun Blok e donashon ta pa meta humanitario so.
Blok a reakshoná riba preguntanan di parlamentario hulandes pa partido D66, Sjoerd Sjoerdsma.
Dia promé di febrüari di e aña aki Sjoerdsma a manda preguntanan pa Blok tokante situashon di sinku piskadó – kuater yu’i Kòrsou i un venezolano ku tin pèrmit di estadia pa Kòrsou. Nan ta será pa kasi un aña den prisòn na Venezuela.
Sjoerdsma a pidi minister Blok: ‘Si ta kuadra ku gobièrnu ulandes a duna sosten finansiero na Venezuela den aña ku ta tras di lomba? Si e kontesta ta si, kiko tabata e motibu.’
Tambe Sjoerdsma tabata ke sa ‘ora Hulanda a entregá e sèn si nan a eksigié pa e sinku hulandesnan keda poné den libertat. Si e kontesta ta negativo, dikon no?’ El a puntra minister Blok ‘kua ta e intento ku e minister a hasi pa por liberá e siudadanonan hulandes aki.’ I si minister por splika Tweede Kamer ku e ta hasiendo tur loke ta posibel pa por haña libertat dje hulandesnan aki.
Blok a bisa entre otro ku embahada di Reino Hulandes na Venezuela a yuda e sinku hòmber. ‘Pero un embahada no por kita siudadanonan for di un prisòn den un otro pais.’ Tambe el a bisa ku Hulanda no por mishi direktamente ku hurisdikshon di Venezuela. Pero Hulanda a pidi pa un situashon di detenshon humano i tambe tratamentu hustu den korte i mas lihé posibel. Asina Blok a skirbi den un karta pa Sjoerdsma.