ROTTERDAM.- Medionan di komunikashon den vários partinan importante di mundu ta komentando e echo ku Hulanda i e siudat Rotterdam mester tuma desishon pa desmantelá un brùg históriko den sentro di e siudat di manera ku e super yate di Jeff Bezos, por subi laman grandi. Bezos doño di Amazon, un di e hòmbernan di mas riku na mundu a laga e kompania na Ulanda, Oceanco na Alblasserdam traha su super yate nobo pa un kosto di 430 mion euro. Alkalde di Rotterdam Ahmed Aboutaleb den un reakshon hopi trankil a bisa ku e no ta komprondé pa kiko tantu papiamentu. Segun Aboutaleb, parse e kompania Oceanco no a pidi pèrmit ainda ofisialmente.

Ta konosí ku Hulanda ta un pais unda e hendenan hopi riku di tur parti di mundu ta laga traha nan super yatenan. Esaki ta un pila ekonómiko hopi fuerte na Hulanda. Djis pa menshoná algun nòmber konosí tin Kaos, Octopus, Feadship, Anna, Blackpearl i hopi mas.

Hulanda mes ta hopi trankil miéntras ku mundu ta preokupá ku lo bai desmantelá Koningshavenbrug mihó konosí komo “De Hef”. E kompania Oceanco ta mustra ku esei ta e úniko manera pa e super yate por yega laman grandi, simplemente no tin otro kaminda pa e sali. E brùg ta permití embarkashon te un altura di 40m, pero den e kaso aki e mastnan di e super yate di Bezos ta muchu mas haltu. Tin indikashon ku Rotterdam no tin problema pa desmantelá e brùg históriko basta Bezos paga.

“De Hef” ta e promé parti ku a keda restourá despues di segunda guera mundial. Den tempu di guera ku alemannan e brùg a keda destruí. Awendia metro, i otronan ta pasa den túnel bou di riu Maas. Ta bon pa indiká aserka ku Koningshavenbrug ta un monumento! Sinembargo esaki ta un oportunidat tremendo di hasi negoshi ku Jeff Bezos i asina sigui stimulá e ekonomia hulandes mas tantu. Korsou lo por konsiderá un oportunidat di negoshi asina, òf no tin e kurashi nesesario?

 

LAGA UN KOMENTARIO

Please enter your comment!
Please enter your name here