...Promé minister Eugene Rhuggenaath...

WILLEMSTAD.- Hulanda lo hasi un donashon di 30 mion euro pa drecha skolnan na Kòrsou, esaki ta loke ku minister sr. Eugene Rhuggenaath a duna di konosé ayera den rueda di prensa. Pero tambe lo haña un fiansa adishonal pa esnan ku a pèrdè trabou i kobradónan di ònderstant den nos komunidat.
Sr. Rhuggenaath a indiká ku nos ta den un krísis di COVID-19, konsekuensia di esaki tin falta di likides riba impuesto dor di entrada ku lo a haña for di aprel te awor aki. Mester tin fondo pa kontinuá ku sosten ku ta duna na NOW.
Kòrsou ke inkluí pa tin un pakete mas hustu pa yuda empresanan sobreviví despues di COVID-19.
Pero tambe a papia ku sr. Knops riba nivel polítiko, kaminda a bisa ku ta importante pa di parti Hulanda konsiderá e sosten sosial ku Kòrsou ta duna na esnan ku a pèrdè trabou, i ta dependé di ònderstant, pa esaki tambe keda finansiá ku yudansa di Hulanda. Pasobra Kòrsou no por sigui kòrta den nos presupuesto pa finansiá un sosten na un grupo importante den nos komunidat.
Promé minister a bisa ku e tabatin kombersashon último dianan ku sr. Knops spesialmente riba e situashon di COVID-19 riba nos isla ku a bolbe lanta kabes. E situashon ta impaktá komunidat, i p’esei ta konsiderá p’e tin su mérito pa forma parti dje sosten finansiamentu di Hulanda sin ku Kòrsou tin di bolbe bai kòrta i hasi ehersisio den presupuesto.
E pronóstiko di likides ku tabatin, ounke minister di finansa a hasi algun ehersisio pa wak tòg kon por hasié pa fin di aña, pero tin gastunan di otro ministerio ku lo por mishi kuné. Knops a bai di akuerdo ku e ta keda inkluí den finansiamentu ku Hulanda. E NOW regeling tambe lo forma parti dje sosten finansiero nobo aki. A base di e pronóstiko di likides te ku fin di aña, e fiansa aki ta bin aserka. Esaki ta un parti nobo tambe ku lo forma parti dje fiansa.
Ora tin un akuerdo polítiko ku ta keda formalisá den un RMR, na e momentu ei por kuminsá konta ku finansiamentu di e di tres transche. Un dje proposishonnan ta ku mester a kumpli ku kondishonnan di dos transche, Kòrsou a hasi tur loke ta di nan parti. Despues ta kuminsá traha riba e agènda di invershon i reformanan ku mester keda finansiá. Esaki lo no warda te ora ku e órgano den lei ta kla, mesora ta kuminsá traha riba ehekushon mutuo, e tim di Kòrsou ku e tim di Hulanda, gobièrnu di Kòrsou ku gobièrnu di Hulanda.
A menshoná ku tin un oferta di parti di Hulanda di 30 mion euro kual ta un inisiativa di Hulanda i sekretario di estado Knops, kual suma ta bini den forma di donashon pa proyekto di mehorashon di infrastruktura, edifisionan di skolnan i tambe pa prepará skolnan p’e trayekto di digitalisashon ku ta andando. Segun promé minister ainda tin di detayá esaki i ainda ta trahando riba e plan, ku por parti ta kla. Mester terminá e “businesscase”.